Një atentat me viktimë 64-vjeçarin Gjovalin Prendi ka tronditur Lezhën mbrëmjen e djeshme. Gazetari i Klan News, Martin Marku është rikthyer ditën e sotme në vendin e ngjarjes nga ku raporton detajete fundit. Bëhet e ditur se disa persona janë shoqëruar në polici lidhur me këtë ngjarje, por nuk dihet nëse këto janë persona në dijeni apo të dyshuar si autorë të kësaj ngjarje.
Kujtojmë se Gjovalin Prendi është babai i Sidorel Prendit, i njohur edhe si Roan Brahimi, i ekzekutuar 1 vit më parë në Athinë në sytë e fëmijës së tij.
Emri i Roan Brahimit ishte i njohur për drejtësinë shqiptare. Ai njihej si rivali i Ervis Martinajt dhe akuzohej si i përfshirë në atentatin ndaj Ylli Brahimit, ku mbeti i vrarë Klisman Preçi.
Roan Brahimi ishte në kërkim policor edhe për ekzekutimin e Brilant Martinajt dhe miqve të tij, në mbikalimin e Fushë-Krujës, më 17 Korrik 2022.
Ndër të tjera ai dyshohej se kishte lidhje edhe me vrasjen e Gentjan Bejtjes, i ekzekutuar disa muaj para Brahimit në vitin 2024.
Deri më tani mbetet e paqartë nëse ekzekutimi i Gjovalin Prendit ka lidhje me të shkuarën e errët të djalit të tij, por gazetari Marku shprehet se pista kryesore e policisë është ajo e hakmarrjes.
Dyshohet se drejt 64-vjeçarit të jetë shkrepur një breshëri automatiku nga dy persona nga e njëjta makinë. Po ashtu dy persona të tjerë të armatosur kanë qenë të gatshëm që nëse dy autorët e parë nuk do të arrinin objektivin do të ishin ata që do ta ekzekutonin Prendin.
