Kjo është makina Golf që përdorën autorët e vrasjes së Gentian Bejtjas, për t’u larguar pas ngjarjes së rëndë.
Mësohet se mjeti ishte në pronësi të 30-vjeçarit Edison Haxhiu.
Në njoftimin e saj për mediat, policia dha detaje sesi ra në gjurmët e dy të arrestuarve.
Kështu, pasi qëlluan me breshëri plumbash në drejtim të Bejtjas, në serën që ndodhej në oborrin e shtëpisë së tij, autorët u larguan në aksin rrugor Larushkë-Thumanë dhe pas kalimit të mbikalimit të Fushë-Krujës u kthyen majtas, duke djegur makinën e tyre në fshatit Hasan, aty ku dhe u gjet më pas nga hetuesit.
Pas kësaj, autorët përdorën pikërisht këtë Golf për t’u larguar drejt fshatit Bubq të Krujës.
Ishte analizimi i kamerave të sigurisë që bëri të mundur identifikimin e kësaj makine, që rezultoi në pronësi të të arrestuarit Edison Haxhiu e që përdorej edhe nga Ilir Brahimi. Policia thotë se fillimisht shoqëroi pronarin e makinës, e më pas Ilir Brahimin.
Nga kontrolli në shtëpinë e këtij të fundit, policia gjeti dy armë zjarri, fishekë, radiomarrëse, si dhe një pasaportë e kartë identiteti me shtetësi kosovare.
Në atentatin ndaj 42-vjeçarit Gentjan Bejtja dyshohet se morën pjesë 4 persona.
