Grupi hetimor ka mbledhur të dhëna dhe dëshmi për atentatin mafioz të ditës së djeshme në Tiranë, ku mbeti i vrarë 50- vjeçari Arben Bilali, ish-efektiv policie. Kamerat e shumta të sigurisë dhe dëshmitë kanë ndihmuar policinë të zbardhë gjithë dinamikën dhe të identifikojë mjetin me të cilin u krye atentati, një Mercedes Benz, ngjyrë blu me targa false AA 757 RV.
Këto targa i përkasin një mjeti Fiat Punto, i vjedhur në Vlorë në vitin 2017. Ndërsa autorët besohet se kanë qenë vrasës me pagesë. Bilali u vra pranë banesës së tij në Selitë, teksa ishte duke zbritur nga makina, pasi kishte qenë me një shokun e tij për kafe, pranë “Unazës së Re”.
TV Top Channel raporton se “hetuesit kanë mundur të sigurojnë dy dëshmi me interes për hetimin. Njëri prej dëshmitarëve ka thënë se përpara disa ditëve i ka ndjekur një makinë, e atë ditë ishte duke udhëtuar me viktimën. Gjithashtu, një tjetër shok i viktimës ka thënë se një makinë i ka ndjekur ditët e fundit. Nga hetimet mësohet se, viktima ka pasur një pistoletë me vete, por shokët e tij ia kanë hequr në momentin që e larguan trupin e tij për në spital, për t’ia dorëzuar më pas policisë”.
“Prokuroria ka marrë në pyetje gjatë kësaj të enjteje edhe A. Xhabaftin, i kthyer në Shqipëri së fundi pasi jeton në Angli. Shërbimi i Provës i ka kërkuar atij të paraqitej më 23 janar, sepse është i dënuar me punë në interes publik, për veprën penale të kundërshtimit të policisë.
“Erdha në Shqipëri për këtë dënim, – ka thënë A. Xhabafti. – Nuk kam probleme dhe të ndjerin e kam parë vetëm një herë në vitin 1992. Ditën që ndodhi krimi isha për drekë me miqtë”. Edhe kjo dëshmi është zbardhur nga Top Channel. Madje, A. Xhabafti ka thënë para hetuesve se, edhe kur i vranë vëllanë i kishte dërguar lajm Bilalit se nuk e kishte nga ata, lajm të cilin e kishte dërguar me anë të shtetasit G.C.
Kujtojmë se Arbeni është viktima e tretë në familjen Bilali. Më parë atij kanë vrarë dy vëllezërit. Bujar Bilali u vra në 1997, vëllai tjetër Leonardi, ish mundës i Dinamos, u qëllua për vdekje në gusht të vitit 2010./Burimi: TCH
*Fotot nga vendi i ngjarjes
