Kanë kaluar më shumë se 24 orë nga vrasja e 58-vjeçarit Renato Hoxhaj në Vlorë, por deri më tani uniformat blu nuk duken të kenë arritur gjëkundi, pasi nuk ka ende një autor të dyshuar.
Gazetarja e Klan News, Greta Haskaj, raporton se ka një mungesë të theksuar të provave materiale për të bërë zbardhjen e plotë të kësaj ngjarje, motivin e saj dhe identifikimin e autorëve.
Nga ajo që dihet deri më tani është fakti se Hoxhaj është qëlluar nga rrugica “Hajro Çakërri”, nga ku nuk ka kamera sigurie, një ndihmesë e madhe kjo për autorët e krimit për të mos u identifikuar nga blutë. Atentatorët më pas janë larguar nga rruga e pasme.
E pse mungesa e kamerave të sigurisë në këtë rrugicë është një sfidë për hetuesit, këta të fundit po mbajnë shpresa në kamerat e sigurisë përreth, për të gjetur sadopak një material ndihmës në zbardhjen e krimit.
Viktima nuk raportohet të ketë pasur ndonjë precedent penal në të shkuarën, as ndonjë konflikt që mund të pasonte në vrasjen e tij.
“Policia e Vlorës nuk ka ende asnjë pistë konkrete hetimi sa i përket zbardhjes së ngjarjes. Asnjë autor i dyshuar për momentin, për arsye se mungojnë provat material dhe sigurisht mungesa e provave materiale ka vështirësuar punën e bluve të Vlorës. Ajo që i ka ndihmuar pak le të themi, kanë qenë kamerat e sigurisë, ku ata janë fokusuar.
Megjithatë, ajo që duhet të themi është që atentatorët kanë goditur nga rrugica “Hajro Çakërri”, në të cilën nuk ka pasur kamera sigurie. Nga këqyrja e kamerave të sigurisë, është kapur dhe është vërejtur vetëm një sekuencë ku mund të shihet fare qartë trupi i 58-vjeçarit duke rënë përtokë, pikërisht duke përshkuar rrugën në lagjen Hajro Çakërri, në momentin kur ishte duke shkuar për në banesën e tij rreth orës 6 të mëngjesit.
Por, në kamerat e sigurisë, nuk shihet asnjë nga atentatorët që del në rrugë kryesore. Pra, ata kanë qëlluar nga rrugica pa kamera sigurie dhe janë larguar po nga rruga e pasme.
Sa i përket të shkuarës së 58-vjeçarit, deri më tani sipas informacioneve që kemi, duke marrë për bazë deklaratat që kanë dhënë të pyetur në polici familjarët e të afërmit e Hoxhaj, duhet thënë në fakt se ky person nuk ka pasur precedent penal të mëparshëm apo ndonjë konflikt të mëhershëm që do çonte në kryerjen e këtij atentati.
Ajo që dua të theksoj është deklarata e Klodiana Rakipajt, bashkëjetuesja e të ndjerit. Po t’i bazohemi dëshmisë së saj, ajo shprehet se kishte 2 vite që bashkëjetonte me 58-vjeçarin, ndërkohë ky i fundit ka punuar më parë si roje nate në një subject privat pranë shtëpisë ku ata jetonin, por ka lënë punën në këtë subjekt prej një viti, konkretisht në janar të vitit që lamë pas”, raporton gazetarja Haskaj.
Renato Hoxhaj u ekzekuta mëngjesin e së dielës (27 Prill) me 3 plumba, 2 prej të cilave në kokë dhe 1 në kraharor. Ka qenë partnerja e tij ajo që ka njoftuar Policinë, pasi e gjeti të pajetë në rrugicë, rreth 2 orë pas ngjarjes.
Në një intervistë ekskluzive, bashkëjetuesja e të ndjerit u shpreh se i dëgjoi të shtënat kur ndodhej në shtëpi, por i konsideroi si fishekzjarre.
“Më pyetën vetëm për këtë. Pe gjë më thanë, nuk pash gjë i thash unë. Unë s’pash gjë. Unë isha brenda i thashë. Unë e dija se ishin fishekzjarre i thashë. Mendova i thashë se ishin fishekzjarre, mendova. Nuk dola i thashë, se po vishesha. Në atë kohë, i thashë unë, po vishja rrobat, e s’mund të dal. Si do dilja unë”, tha Rakipaj për gazetaren Greta Haskaj./tvklan.al
