Policia e Elbasanit ka arrestuar 2 persona lidhur me vrasjen e 32-vjeçarit të ndodhur mëngjesin e të hënës në Peqin.
Uniformat blu informojnë se janë vënë në pranga 2 shtetas, të dyshuar si përkrahës të autorëve të krimit.
“Strukturat hetimore të Drejtorisë Vendore të Policisë Elbasan, në bashkëpunim me ato të Komisariatit të Policisë Peqin, nën drejtimin e Prokurorisë së Rrethit Gjyqësor Elbasan, kanë vijuar intensivisht punën hetimore, me qëllim zbardhjen e vrasjes së 32-vjeçarit Albi Bashaliu.
Si rezultat i veprimeve të thelluara hetimore, u bë i mundur arrestimi i shtetasve:
V.B., 41 vjeç dhe M. Xh., 30 vjeç, të dy banues në fshatin Gjoçaj, Peqin”-njofton policia.
Në bazë të hetimeve të kryera është dokumentuar se këta shtetas kanë kryer veprime aktive për të fshehur rrethanat e ngjarjes dhe kanë penguar aktivisht organet e Policisë, për t’u informuar për ngjarjen, rrethanat si ka ndodhur dhe motivin.
Gjithashtu raportohet se, në ndjekje e sipër të autorëve të dyshuar të veprës penale, më datë 28.12.2021, rreth orës 01:00, në aksin rrugor Gosë-Vibashtovë, Rrogozhinë, është gjetur automjeti tip “Volksëagen Caddy”, që ka qenë në përdorim nga viktima, shtetasi A. B.
Sipas policisë dyshohet se autorët kanë marrë mjetin e viktimës për t’u larguar, ndërsa mjetin me të cilin ata udhëtonin e kanë djegur në vendngjarje.
Mësohet se në vendngjarje janë gjetur sende të ndryshme, të cilat u sekuestruan në cilësinë e provave materiale dhe që u dërguan për ekzaminime të mëtejshme në Institutin e Policisë Shkencore.
Nga strukturat hetimore të Drejtorisë Vendore Elbasan, nën drejtimin e Prokurorisë së Rrethit Gjyqësor Elbasan, po punohet për identifikimin dhe kapjen e autorëve.
Kujtojmë se Albi Bashaliu u ekzekutua, nga persona ende të paidentifikuar, mëngjesin e të hënës, më 27 dhjetor në një rrugë të fshatit Gjocaj, Peqin.
Albi Bashaliu ishte vëllai i Leonard Bashaliut, i cili 6 muaj më parë ekzekutoi 44-vjeçarin Ylber Xhahysa. 36-vjeçari ndodhet në burg pasi qëlloi me armë zjarri Xhahysëm më 8 qershor 2021, në Peqin./Opinion.al
