Xhuljo Hoxhaj dhe Euglen Halilaj, dy vrasësit me pagesë të 23-vjeçarit Regis Runaj, në Elbasan, kanë dalë para togave të zeza ku janë njohur me masën e sigurisë.
Në seancën gjyqësore e cila zgjati për më pak se një orë, gjyqtarja Pajtime Fetahu caktoi masën “arrest me burg” pa afat për dy të akuzuarit, të cilët dyshohen gjithashtu se kanë marrë pjesë në ekzekutimin e Emiljano Ramazanit.
Sipas policisë, këta persona janë paguar për vrasjen e Emiljano Ramazanit dhe Regis Runajt.
Hetimet kanë zbuluar se Regis Runaj, mbrëmjen e 29 korrikut ka qenë në shoqërinë e Xhuljo Hoxhajt dhe Euglen Halilajt. Pasi kanë konsumuar lëndë narkotike në periferi të qytetit, Euglen Halili ka goditur Regis Runaj një herë me thikë nga mbrapa shpinës dhe më pas e ka goditur edhe 26 herë të tjera duke i shkaktuar vdekjen e menjëhershme. Trupi i Regis Runaj u gjet buzë rrugë në lagjen “Emin Matraxhiu”, i mbuluar në gjak.
Gjaku i gjetur në motorrin e sekuestruar autorëve ka konfirmuar përfshirjen e tyre në vrasjen e 23-vjeçarit Regis Runaj. Gjithashtu janë sekuestruar edhe një shumë eurosh dhe prova të tjera ligjore.
Gjithashtu nga hetimet ka rezultuar se këta dy shtetas janë të përfshirë edhe në vrasjen e Emiljano Ramazanit ndodhur më datë 20 korrik 2020 në qytetin e Elbasanit, pasi nga provat e grumbulluara rezulton se të dy këta shtetas kanë ndjekur dhe kontrolluar lëvizjet e viktimës./ Opinion.al
