Pas zhurmës së madhe që u shkaktua në media dhe politikë për largimin jashtë vendit të Nezar Seitit i cili po hetohet paralelisht në Shqipëri dhe Itali, për trafik droge si pjesë e bandës së Habilajve ka reaguar edhe këshilli i Lartë i Drejtësisë. Ndryshe nga Ministria e Drejtësisë dhe Prokuroria e Përgjithshme që kanë deklaruar se s’kanë patur dijeni për hetimet që po bëheshin në Shqipëri, KLD çmon se mund të jenë shkelur procedurat ligjore nga gjyqtari që lejoi ekstradimin e financierit të Habilajve në Itali.
KLD ka vendosur të kryejë hetim disiplinor për të verifikuar dyshimet e arsyeshme për shkelje në procedurat gjyqësore që mund të përbëjnë shkelje disiplinore nga ana e gjyqtarit Kastriot Gramshi.
“Këshilli i Lartë i Drejtësisë ka nisur hetimin disiplinor ndaj gjyqtarit të Gjykatës së Rrethit Gjyqësor Tiranë, K.Gramshi, për veprimtarinë gjyqësore të tij në dhënien e vendimit të datës 18.12.2018, për lejimin e ekstradimit për shtetasin shqiptar Nezar Seiti.
KLD njofton opinionin publik se nga shqyrtimi paraprak i ngjarjes, konstatohet se ka vend për fillimin e hetimit disiplinor për të verifikuar dyshimet e arsyeshme të ngritura në media dhe në opinionin publik për shkelje në procedurat gjyqësore të ekstradimit dhe që mund të përbëjnë shkelje disiplinore të gjyqtarit në Gjykatën e Rrethit Gjyqësor Tiranë.
Nga ankesa publike dyshohet për shkelje të rënda profesionale që diskreditojnë rëndë figurën dhe pozitën e gjyqtarit sipas nenit 140 pika 2 të Kushtetutës (shkelje haptazi e nenit 491 pika 1 shkronja ‘ç’ dhe 498 pika 2 të K.Pr.Penale), të cilat nëse provohen se janë kryer, veç të tjerave përbëjnë shkelje disiplinore të parashikuar nga ligji”, thuhet në deklaratë.
