“Tifozat Kuq e Zi” dalin në mbrojtje të Ismail Morinës, të ashtuquajturit “Ballisti”, që ngrit dronin me flamurin e Shqipërisë së Madhe në mes të Beogradit, kur po luhej ndeshja kualifikuese Serbi-Shqipëri. Vendimi më i fundit i Gjykatës së Dubrovnikut në Kroaci për ta ekstraduar në Serbi ka ngjallur zemërim te tifozët shqiptarë, por jo vetëm. Për ta evituar diçka të tillë, tifo-grupi më i madh dhe i organizuar i kombëtares shqiptare do të protestojë para Kryeministrisë, duke kërkuar nga autoritetet shqiptare të ndërhyjnë:
“Të gjithë u ndjemë krenarë mbrëmjen e 14 tetorit, kur mbi qiellin e Beogradit u ngritën heronjtë tanë mbi një dron. Të gjithë iu gëzuam tri pikëve të Beogradit. Këto ndjenja na i dhuroi Ismail Ballist Morina, por ai prej asaj dite, edhe pse një hero për shqiptarët, vetëm është endur burgjeve dhe gjykatave. Më e fundit është se Kroacia ka pranuar ekstradimin e tij drejt Serbisë. Të shtunën duhet të bashkohemi në një protestë masive përballë Kryeministrisë për të kundërshtuar këtë vendim dhe për të nxitur kryeministrin të reagojë për Ballistin. Duhet të tregojmë se jemi bashkë, të tregojmë se jemi shumë, të tregojmë se jemi me Ballistin, të tregojmë se ne do ta bëjmë luftën tonë për ta mbrojtur dhe lartësuar Ballistin. Pa dallim feje, krahine e tifogrupi duhet të jemi aty bashkë dhe sa më të shumtë në numër. Te Kryeministria, ora 19:00.”
