Eksperti i sigurisë rrugore, Mamir Hodo, bëri të ditur në emisionin “Aldo Morning Show ” në Tv Klan se po punon mbi një draft-ligj të ri që synon rregullimin e përdorimit të monopatinave elektrike.
Kjo marrë shkas edhe nga ngjarjet e fundit të aksidenteve të monopatinave, që kanë ndodhur në vend.
Sipas tij, drafti parashikon një kufi maksimal fuqie prej 0.5 kilovatësh dhe një shpejtësi maksimale prej 20 kilometrash në orë për këto mjete.
“Aktualisht unë jam duke punuar me një draft-ligj të posaçëm për rregullimin e mjeteve të mikromobilitetit elektrik personal. Mendojmë që do të aplikohet që këto patina të mos kenë një fuqi më shumë se tepër se 0.5 kilovatë në rrugë, me 20 kilometra në orë. Do të ketë siguri ndaj të tretave mjeti monopatin.
Ai që duhet të ketë monopatinë duhet të bëjë edhe sigurinë sepse kanë ndodhur aksidente në rrugë, ku janë plagosur edhe këmbësorë, të cilin monopatina e ka kaluar edhe në gjendje kome. Duke qenë se mjeti nuk ka siguri, atëherë është një përgjegjësi shumë e madhe për dëmin e shkaktuar ndaj të tretave. Me ligjin e ri që vjen monopatinat do të jenë të identifikuara, të targuara me targë digjitale. Do i kufizojmë me 20 kilometra në orë.”
Për sa i përket përdorimit të monopatinave me qira, eksperti theksoi se ky është një problem serioz në Shqipëri, pasi shpesh mjetet merren edhe nga fëmijë 8-vjeçarë. Draftligji do të përfshijë rregulla për kufizimin e përdoruesve dhe ndalimin e dhënies me qira për të miturit.
“Do të shikohet problemi i dhënies me qira të monopatinave, sepse mjeti me qira është një problem sepse ti nuk e kontrollon dot personin që e ka marrë. Këtu në Shqipëri marrin mjete me qira edhe fëmijë që janë tetë vjeç. Do të vendoset si kriter edhe përdorimi i alkoolit, sepse duke qenë se është mjet rrugor, do të qarkullojë në rrugë, krijon rrezik për të dëmtuar veten dhe sigurinë e qytetarëve ai do të zbatojë kërkesat e Kodit Rrugor njësoj si drejtuesit e automjeteve.
Për momentin nuk mendoj se do të ketë një patentë për monopatinën sepse është njësoj si një biçikletë. Përderisa ne do e kufizojmë shpejtësinë në 20 kilometra në orë nuk do të ketë një problem të tillë.
Një nga pikat kryesore të draftligjit është identifikimi i monopatinave përmes targave digjitale si dhe ndalimi i përdorimit të monopatinave nën ndikimin e alkoolit.
“Do të kontrollohet me sisteme të digjitalizuara, do të kontrollohet edhe shpejtësia e tyre. Nëse një monopatinë është më shumë se 0.5 kilovatë ajo do të kontrollohet përmes sistemeve, i cili është në marrëdhënie me GPS dhe do të kontrollohet nëpërmjet radarëve. Është si një gardh elektrik i vendosur.
Nëse mjeti e ka të instaluar vetë në monopatainë dhe nëse hyn në këtë zonë të përcaktuar, e cila do të bëhet në bashkëpunim me bashkinë dhe me institucionet përkatëse, ku do të kontrollohen para zonës së Universitetit Politeknik, do të jenë të vendosura koordinatat dhe sapo mjeti të gjendet në atë zonë, atëherë automatikisht shpejtësia e saj do të ulet në 20 kilometra në orë, ose edhe më pak.”/tvklan
