Menaxhimi i situatës së pandemisë nga ana e autoriteteve shqiptare vuan nga mungesa e vizionit dhe organizimit sipas specialistit të shëdetit publik, Erion Dasho.
Në një një intervistë për A2 CNN ai u shpreh i shqetësuar për numrin e testimeve që bëhen në vend duke thënë se ne kapim vetëm 10% të rasteve. Duke u nisur nga numri i viktimave nga Covid-19 në vendin tonë, sipas tij ka të paktën 1000 raste ditore me koronavirus.
“Duke parë numrin e vdekjeve, 4-5 viktima në ditë, që është një shifër që nuk mund të fshihet, kam përllogaritur se numri i personave të infektuar ka qenë të paktën 1000 persona në ditë. Ne kemi raportuar për një maksimum prej 154 personash të prekur në ditë dhe kjo tregon që ne arrijmë të kapim vetëm 10% të personave të infektuar në popullatë. Që të kapim vetëm 10% të rasteve dhe të këmbëngulim se numri i testeve që bëjmë është i mjaftueshëm, për mua kjo tregon mungesë dëshire për të njohur situatën dhe një mangësi të madhe në testime. Jemi vendi i fundit në Evropë përsa i përket testimeve”, tha Dasho.
Sipas tij, “duhet të testojmë 2000-5000 persona në ditë”. Dasho thekson se ka disa aspekte ku vendi ynë po çalon: “Tek ne çalon edhe gjurmimi i rasteve. Vendet e tjera gjurmojnë me metoda digjitale, ndërsa ne gjurmojmë si në shekullin XIX. Bëhet fjalë për mungesë vizioni dhe organizimi, pasi kapacitetet janë. Në fund, lë për të dëshiruar edhe trajtimi. Mjeku i familjes ka hyrë shumë vonë në lojë, janë të ekspozuar ndaj virusit sepse nuk janë riorientuar sistemet shëndetësore. Na çalon trajtimi te mjeku i familjes dhe nëpër spitale rajonale”./ Opinion.al
