Christian Panucci u shkarkua zyrtarisht sot nga detyra e trajnerit të kombëtares shqiptare. Ai mori drejtimin e ekipit tonë, pas Gianni De Biasit, gjatë kualifikueseve për Botërorin e vitit 2018. Megjithëse një trajner pa shumë eksperiencë, në atë kohë Presidenti i FSHF-së Armand Duka tha se objektiv ishte kualifikimi për në kampionatin Europian 2020.
“Një nga emrat më të mëdhenj të futbollit botëror, një emër i rëndësishëm i futbollit italian, me përvojë në fushën e lojës, por ndoshta modeste në trajnim. Jam i sigurt që kemi bërë zgjedhjen më të mirë me të gjitha karakteristikat që ka trajneri i ri. Jam i bindur se me stafin e tij dhe të gjithë ne do të bëjmë të mundur që të jemi pjesë e Euro 2020″, do të thoshte Duka në vitin 2017.
Por problemet me lojtarët, loja e dobët dhe humbja në ndeshjen e parë me Turqinë, kanë bërë që Dukës t’i soset durimi. Megjithëse e quajti eksperiencën e tij “modeste”, Duka i dha dy shanse, edhe pas humbjeve në ndeshjet kualifikuese të Botërorit, edhe pas paraqitjes së dobët në Ligën e Kombeve. Përpara stolit të ekipit tonë kombëtar, Panucci ka qenë për dy vite zëvendëstrajner i Rusisë, dy herë nga disa muaj trajner i Livornos dhe pak muaj trajner i Ternanës.
Tashmë mbetet që në krye të kombëtares sonë, të emërohet një trajner me eksperiencë, duke hequr dorë nga eksperimentet me stolin kuqezi. Në krye të listës për të pasuar Christian Panuccin, sipas mediave sportive, mbetet Edy Reja, trajneri 73-vjeçar italian që në të shkuarën ka drejtuar Napolin, Lazion, Genoan e Atalantën./Opinion.al
