“Në një kohë kur bizneset ankohen për mungesën e fuqisë punëtorë, tregu i punës po bëhet gjithnjë e më sfidues për të rinjtë dhe ata që nuk kanë përvojë. Vendet e lira të punës dominohen nga kërkesa për eksperiencë, ndërsa mundësitë për ato pa përvojë po ngushtohen”, raportoi gazetarja Dorina Halili.
Të paktën sipas të dhënave të marra nga Agjencia Kombëtare e Punësimit dhe Aftësive viteve të fundit ka një rënie të vendeve të lira të punës ku nuk kërkohet eksperienca, nga 23 mijë në 2023-in në 17 mijë në 2024-ën.
“Ky është një trend i cili lidhet shumë me mentalitetin, kryesisht i sipërmarrjeve në Shqipëri të cilët kanë maninë për të patur një person me shumë përvojë pune për një profil pune që se kërkon fare, thjesht dhe vetëm s’duam kosto shtesë për punonjësit në hapat e para të punës”, tha Erion Muça, ekspert punësimi.
Eksperti i punësimit Erion Muça thotë se sipërmarrjet kanë nevojë të ndryshojnë qasjet e tyre për rekrutimin e punonjësve.
“Kërkesa e eksperiencës së punës ndaj të rinjve është një kërkesë jo vetëm e ekzagjeruar, por i çfokuson dhe nuk i ndihmon sipërmarrjet të rekrutojnë punonjës të rinj, të cilët vërtet nuk kanë përvojë, po kanë aftësinë, kreativitetin, kanë qasjen ndaj inovacionit, kanë përditësimin e duhur ndaj dinamikave dhe trendit të kohës”,tha Erion Muça, ekspert punësimi.
Muça i këshillon të rinjtë që të mos demotivohen nga ky element pengues që shpesh është fiktiv, por të aplikojnë për të treguar aftësitë e tyre.
“Përmes iniciativës dhe këmbënguljes mund ti tejkalojnë dhe të gjejnë gjuhën e bashkëpunimit”, tha Muça.
Në vitin e shkuar, 28% e vendeve të lira të punës nuk kërkonin përvojë pune.
Aktivitetet ekonomike me nivelin më të lartë të vendeve të lira të cilat nuk kanë kriter eksperiencën janë shërbime administrative dhe mbështetëse, transporti dhe magazinimi, bujqësia, pyjet dhe peshkimi si dhe industria përpunuese.
Tv Klan
