Sipas të dhënave të fundit, nga Shqipëria në vitin 2017 janë larguar 207 mjekë, ndërsa në Kosovë, 161. Fenomeni i largimit të mjekëve drejt Bashkimit Europian ka prekur të gjithë rajonin e Ballkanit, kryesisht Shqipërinë, Kosovën dhe Maqedoninë e Veriut. Arsyeja kryesore që kjo ndodh janë pagat e ulëta, kështu që mjekët detyrohen të kërkojnë mundësi punësimi në vendet perëndimore, kryesisht Gjermani.
Në Shqipëri rritja e rrogave të mjekëve ka qenë një kërkesë e vazhdueshme për qeverinë. Kjo edhe për arsye të shmangies së dypunësimit.
Vendimi i fundit i qeverisë në lidhje me rritjen e rrogave për bluzat e bardha hyri në fuqi më 1 Prill dhe miratoi një rritje me 7%. Aktualisht një mjek familje paguhet 64 mijë Lekë neto ose 80.112 mijë bruto, ndërsa një specialist merr 92 mijë Lekë neto ose 114.887 bruto. Për mjekët specialistë që pranojnë punësimin në rrethe për të plotësuar vendet vakante, rrogës i shtohet edhe një bonos prej 250 mijë lekësh në muaj
“Ne do të kërkojmë vazhdimisht që paga të shkojë te 20 përqind, ne nuk jemi të kënaqur sepse puna e mjekëve është shumë e madhe”, thotë Petrit Fangu.
Këto paga konsiderohen jo të denja për mjekët, sipas Shoqatës së Pacientëve të Kosovës, e për pasojë mjekët janë të dypunësuar në sektor privat dhe publik. /Opinion.al
