Një ditë pas ndotjes së madhe mjedisore në Ksamil, ku shpërthyen ujërat e zeza dhe u derdhën në bregdet vendoset masa administrative ndaj përgjegjësit. Inspektorati Shtetëror i Mjedisit dhe Pyjeve ka gjobitur Ndërmarrjen e Ujësjellës-Kalanizimeve pranë Bashkisë së Sarandës në masën e 5 milionë lekëve të vjetra. Lajmi u bë i ditur nga drejtori i Drejtorisë së Inspektimit Mjedisor Kujtim BEBJA me interesimin e Opinion.al.
“Pasi u verifikua situata dhe përgjegjës rezultoi Ndërmarrja e Ujësjellës Kanalizimeve Sarandë, lidhur me shkeljen ndaj saj, nga ana e ISHMP Vlorë u mor vendimi i dënimit administrativ me gjobë në vlerën 500.000 leke”, deklaron z. Bebja.
Ndërsa lidhur me cilësinë e ujit të detit në Ksamil ai thotë se duhet të priten analizat e Inspektoriatit Shëndetësor.
Reagimi i plotë i Inspektoriatit të Mjedisit për situatën në Ksamil
Znj. Riviera Dedaj
Gazetare e Opinion në TV KLAN
Duke ju referuar pyetjeve Tuaja lidhur me ndotjen mjedisore në bregdetin e Ksamilit, dëshiroj t’ju bëj me dijeni lidhur me masat e marra nga ISHMP për sa vijon:
Dega rajonale e ISHMP Vlorë ka qenë prezent në momentin e incidentit që ka ardhur nga një difekt i tubacionit të ujërave të zeza të qytetit të Sarandës.
Duke marr shkas nga kjo situatë e krijuar ISHMP ka kryer hetimet e nevojshme pë verifikimin e prejardhjes të aksidentit të ndodhur.
Pasi u verifikua situata dhe përgjegjës rezultoi Ndërmarrja e Ujësjellës Kanalizimeve Sarandë, lidhur me shkeljen ndaj saj, nga ana e ISHMP Vlorë u mor vendimi i dënimit administrativ me gjobë në vlerën 500.000 leke.
Duhet theksuar se menjëherë kanë reaguar të gjitha institucionet si Njësia e Qeverisjes Vendore, Drejtoria e Ujësjellës Kanalizimeve Sarandë, Inspektorati Shtetëror Shëndetësor, Forcat e Armatosura dhe një Operator privat që ka berë të mundur rehabilitimin e mjedisit të ndotur.
Lidhur me cilësinë e ujit të detit duhet të shprehet ISHSH pas analizimit të mostrave përkatëse.
Duke ju falenderuar për mirëkuptimin,
DREJTORI
Kujtim BEBJA
*Lajme të tjera rreth së njëjtës temë:
Video/ Shpërthimi i ujërave të zeza, Bashkia: Pushuesit janë kthyer në Ksamil
Video/ Skandalizohen pushuesit në Ksamil, shpërthejnë ujrat e zeza në det
Pamjet skandaloze të ndotjes së Ksamilit dhe reagimi qesharak i kryebashkiakes
Ksamil, shpërthen kanali i ujërave të zeza në det, ndërhyjnë Forcat e Armatosura
