Ekskluzive/ Ja çfarë ndodhi me transponderin që detyroi pilotin të kthejë avionin në Rinas

Në një bisede telefonike me Opinion.al, Aeroporti i Tiranës ka dhënë edhe sqarimet përkatëse mbi atë që ka ndodhur mesditën e sotme me avionin e linjës Tiranë-Milano. Sipas informacioneve që disponon Opinion.al, gjatë fluturimit drejt Milanos, piloti i kompanisë Blu Panorama ka konstatuar se transponderi që transferon te radari sinjalin e ardhjes dhe të mbërritjes, është konstatuar se nuk e kryente këtë funksion. Për këtë arsye, piloti edhe pse nuk kishte difekt në motorr e ka parë të udhës të kthehet në pistë pas 19 minutash fluturim. Kështu avioni i kompanisë Blu Panorama i nisur në orën 13.30 nga Rinasi është riulur në pistë në orën 13.49.  Të interesuar nëse kemi të bëjmë me një procedurë standard në rast të evidentimit të problemeve të tilla në bord gjatë fluturimut, Aeroporti i Rinasit saktëson se në raste të tilla edhe pse nuk ka avari në motor, piloti e shikon të arsyeshme të bëjë ulje të detyruar. Përsa i përket pasagjerëve, të cilët mendohet të jenë rreth 100 të tillë, TIA informon për Opinion.al se ata do të nisen për pak minuta drejt destinacionit të tyre, po me kompaninë Blu Panorama./ Dritan Laci Opinion.al