Guvernatori i Bankës së Shqipërisë, Gent Sejko tha në një dalje për mediat se ekonomia e Shqipërisë po ecën mirë pavarësisht ngadalësimin e rritjes.
“Këshilli Mbikëqyrës vlerësoi se pavarësisht vështirësive, rritja ekonomike ka trend pozitiv. Kjo bazohet në uljen e papunësisë dhe politikat e duhura të aplikuara në ekonomi. Ekonomia shqiptare po njeh rritje pozitive. Prodhimi i Brendshëm Bruto është rritur me 2.3 për qind” tha Sejko.
Megjithatë ajo që nuk cilësoi ai është se trendi rënës i ekonomisë është në tremujorin e tretë radhazi. Në projektin e saj qeveria synonte qe rritja gjatë dy tremujorëve të parë të vitit të ishte 4% ndësa ka qenë pothuajse gjysma, respektivisht 2.2 dhe 2.3%. Madje ky ngadalësim nuk përkon as me paralajmërimin e institucioneve ndërkombëtare se Banka Botërore dhe FMN të cilat parashikuan 3.6%.
“Ekonomia shqiptare ka hyrë në një spirale ngadalësimi, teksa rritja ekonomike edhe sipas shifrave të vet qeverisë u ul për të tretin tremujor rresht. Instituti i Statistikave raporti se në tremujorin e dytë, Prodhimi Kombëtar u zgjerua me vetëm 2.31 për qind, kur për të njëjtën periudhë të vitit të kaluar rritja ishte 4.26 për qind. Në harkun kohor të një viti rritja ekonomike gati është përgjysmuar, çka përbën një ngadalësim të fortë të aktivitetit ekonomik” shkruan gazetari Klodian Tomorri.
Sa i përket uljes së papunësisë që foli Sejko ajo nuk është e mjaftueshme pasi nuk mbulon dot as çerekun e rritjes natyrale të forcës punëtore.
“Vitin e fundit ekonomia ka shtuar gjithsej vetëm 5 mijë vende pune duke mos akomoduar dot as një të katrën e rritjes natyrale të forcës punëtore. Pjesa tjetër e të rinjve që hyjnë për herë të parë në moshë pune i shtohen automatikisht armatës së të papunëve ose marrin rrugët e emigrimit” shton Klodian Tomorri.
Më tej Guvernatori foli për rritjen e kredive në sektorin privat dhe uljen e kredive të këqija në rang vendi.
“Kredia në sektorin privat ka njohur rritje. Tregjet financiare kanë pasur norma të ulëta financiare. Kanë rënë kreditë e këqija në rang vendi. Banka e Shqipërisë sheh rritje të ekonomisë në një kohë-zgjatje afat-mesëm. Normalizimi i politikës monetare pritet që të bëhet në mënyrë graduale.”, tha Sejko.
Megjithatë, rritja e kredive në sektorin privat duhet të ishte në proporcion me konsumin në këtë sektor, gjë që nuk ka ndodhur. Sipas Tomorrit “konsumi privat vazhdon të rritet me ritme anemike, vetëm 2.85 për qind duke reflektuar rritjen e ngadaltë të të ardhurave për familjet”. Ai shton gjithashtu se për herë të parë që nga viti 2013 formimi bruto i kapitalit fiks është negativ pra “ekonomia po përballet me rënien e investimeve private vendase dhe të huaja. Sipas INSTAT në tremujorin e dytë të këtij viti, investimet totale në ekonominë shqiptare u ulën gati me 1 për qind, krahasuar me një vit më parë”.
Guvernatori Gent Sejko u shpreh se sa i takon lojërave të fatit, mbyllja e tyre ka pasur një efekt të vogël negativ në ekonomi. Sejko u shpreh se në lidhje me lojërat e fatit, ka probleme të natyrës më tepër informale.
“Kursi i këmbimit është shfaqur më efektiv se sezoni i kaluar. Euro vazhdon të jetë mbizotëruese ndaj lekut. Mbyllja e lojërave kanë pasur ndikim në rënie, e këtu kemi elementë edhe informalë, por gjithsesi ka ndikuar disi negativisht në ekonomi”, tha ai. /Opinion.al
