Akrepat pickuan më shumë se 500 njerëz në provincën e Asuanit në Egjiptin jugor, pasi u shtynë në rrugë dhe shtëpi nga shirat e rrëmbyeshëm që prekën vendin. Lajmi është bërë i ditur nga faqja e internetit Sada Elbalad, duke cituar Ministrinë e Shëndetësisë së Egjiptit, e cila megjithatë ka mohuar informacionet, për vdekjen e tre personave të helmuar nga këto insekte të rrezikshme.
“503 qytetarë morën një antidot në Asuan pasi u pickuan nga akrepat që u larguan nga strofkat e tyre për shkak të shirave të rrëmbyeshëm,” tha Khaled Abdel Ghaffar, Ministër i Arsimit të Lartë dhe Kërkimit Shkencor i Egjiptit, por që është ministri i përkohshëm i Shëndetësisë.
Më herët një nënsekretar i Ministrisë së Shëndetësisë egjiptiane në Asuan, Ehab Hanafy, tha se “3 persona u vranë dhe 450 të tjerë u plagosën nga pickimi i akrepave për shkak të motit të keq dhe përmbytjeve të fundit që goditën Asuanin dje”.
Qyteti dje u godit nga stuhi të dhunshme breshëri, erëra të forta dhe shira, thekson faqja Al Arabiya, duke kujtuar se pickimet e akrepave zakonisht nuk janë fatale dhe zakonisht shkaktojnë vetëm dhimbje, mpirje, ndjesi shpimi gjilpërash dhe ënjtje.
Megjithatë, në raste të rënda ka vështirësi në frymëmarrje, dridhje të muskujve, lëvizje jonormale të qafës dhe syve, djersitje, të vjella, hipertension, takikardi. Për të garantuar sigurinë e nxënësve, shkollat mbetën të mbyllura.
Ministri theksoi disponueshmërinë e një rezerve të mjaftueshme strategjike antidotesh kundër pickimit të akrepit dhe gjarpërinjve në të gjitha spitalet dhe njësitë shëndetësore në të gjitha qeveritë egjiptiane, si pjesë e planit të dikasterit për t’u marrë me luhatjet klimatike./Opinion.al
