Një ngjarje e pazakontë prishi qetësinë e karantinës paraditen e sotme në Tiranë. Policia arriti të arrestonte një nga personat më të kërkuar për disa vepra kriminale, Orges Bilbilin. Por për kapjen e tij u desh që të përdoreshin armët e zjarrit.
Ai u ndalua nga një efektiv i forcave “Shqiponja” për tu kontrolluar nëse po zbatonte rregullat e qarkullimit që janë vendosur në kohën e pandemisë. Nga frika mos identifikohej, ai u largua me vrap duke i drejtuar armën efektivit. Ky i fundit pasi e paralajmëroi të ndalonte e qëlloi duke e plagosur. Fatkeqësisht nga të shtënat mbeti e plagosur edhe një qytetare e cila është jashtë rrezikut për jetën.
Efektivi i forcave “Shqiponja” ka treguar përballjen e tij me të shumkërkuarin Bilbili përpara ministrit të Brendshëm Sandër Lleshaj. Në një video të ndarë nga ky i fundit në Facebook, shfaqet një moment edhe efektivi që plagosi Bilbilin.
“Iku, qëllova në ajër, hidhe armën, ndalo” dëgjohet ai duke i thënë Lleshajt.
Në njoftimin e saj Policia e Tiranës tha se polici kishte qëlluar ndaj Bilbilit pasi e kishte paralajmëruar njëherë këtë të fundit të ndalonte.
Ministri Lleshaj ka bërë gjithashtu një vizitë në spital ku ka takuar qytetaren e plagosur aksidentalisht duke i kërkuar ndjesë dhe shërim sa më të shpejtë. /Opinion.al
