Kandidati për kryetar i Partisë Demokratike, Eduard Selami është ndalur ditën e sotme në qytetin e Lezhës për të bashkëbiseduar me simpatizantë të së djathtës, në lidhje me komunikimin e platformës së tij elektorale. Mes dhjetra mbështetësve, Selami theksoi se një problem akut i drejtimit të PD-së është mungesa e demokracisë së brendshme. Në këtë linjë logjike, ai premtoi para demokratëve se do të vendoste meritokracinë në parti dhe mbi të gjitha do të ishte një lider perëndimor.
Ndërkaq, ish-kreu i PD-së deri në vitin 1995 u ndal edhe tek humbja e thellë e demokratëve në zgjedhjet e 25 qershorit, garë në të cilën fituan vetëm 44 mandate.
“Kam bindjen që aty ku janë krizat, janë edhe oportunitetet që ne të dalim më të fortë nga kjo gjë. Kam besim të patundur që së bashku nga kjo garë që do të jetë një garë civile, demokratike brenda shtëpisë, ne do të dalim më të fortë”, theksoi Selami.
Mes të tjerash, kandidati për kreun e PD-së deklaroi se ka ardhur koha që shumë gjëra ne si demokrat t’i shikojmë në sy, si dhe të gjejmë dhe arsyet kryesore se përse ne nuk arritëm të fitonim në këto zgjedhje. Sipas tij, për fat të keq, PD nuk funksionon në strukturat e saj, në organizimin e saj, në përzgjedhjen e kandidatëve mbi bazën e vlerave më të mira të demokracisë dhe konkurrencës.
“Meritokracia nuk është fatkeqësisht themeli i karrierës në PD. Ne këtë e dimë, e ndjejmë, ne këtë duhet t’a korrigjojmë. Ka shumë prej tyre që më thonë se përse merr pjesë në një garë që duket se është e pabarabartë. Kritikëve të mi u them që është më mirë një tokë e punuar keq, se një tokë e lënë djerrë”, tha Selami.
Ndërsa, kandidati tjetër, Lulzim Basha turin e takimeve elektorale e nisi nga qyteti i Kavajës.
