Dy policët që shoqëruan Edison Pulën në ambientet e paraburgimit janë vënë në pranga nga kolegët e tyre. SHÇBA bën të ditur se Denis Çela, 22 vjeç dhe Naim Stafuka 39 vjeç akuzohen për shpërdorim të detyrës. Dy punonjësit e policisë kanë neglizhuar kryerjen e detyrës gjatë shoqërimit të Pulës e për pasojë i ndaluari u largua. Ndërkaq në gjendje të lirë po hetohet oficeri i Patrullës së Përgjithshme, G. T. Por paralelisht po hetohet edhe për veprime të qëllimshme, pra nëse policët kanë bashkëpunuar në këtë arratisje.
Ngjarja në fjalë ndodhi në orët e mbrëmjes së të mërkurës ku Edison Pula u arratis nga paraburgimi i komisariatit të Fushë Krujës. Ai ishte një prej 8 të arrestuarve si pjesë e bandës së Niklës i akuzuar tentativë vrasje, atentat me tritol, drogë, etj.
