Familja e 13-vjeçarit Edion Bajraktari, i cili vuan nga autizmi, po kërkon ndihmë në Suedi, pasi në vendin tonë nuk i është ofruar kujdesi i duhur mjeksor. Por Këshilli i Migracionit suedez, ka lëshuar një urdhër dëbimi për familjen shqiptare dhe nuk ka pranuar aplikimin e tyre për azil.
Nëna e Edionit, Evri dhe vajza e saj Adana thonë se 13-vjeçarit nuk i është ofruar kujdesi i duhur mjekësor në Shqipëri. Familja ka një certifikatë nga spitali i Tiranës i cili vërteton se ata nuk mund të ofrojnë kujdesin për djalin, por dokumentet nuk kanë mjaft vlerë provuese, sipas Bordit Suedez të Migracionit. Sipas tyre kjo nuk është një arsye e mjaftueshme që familja të lejohet të qëndrojë në Suedi.
Mjekët në Shqipëri i kishin thënë Evrinit dhe ish-burrit të saj se Edioni do të jetonte deri në moshën 8-vjeçare pasi ai vuan edhe nga “hydrocephalus”, uji në kafkë. Ndaj familja Bajraktari vendosi të shkonte në Suedi, në vitin 2012, kur Edioni ishte shtatë vjeç dhe në gjendje të rëndë shëndetësore. Atij iu bë një ndërhyrje në kokë dhe mjekët i thanë se do e ndihmonin të mbijetonte.
“Në Shqipëri mjekët na thanë të mos shpenzoni para për ta operuar sepse ai do vdesë. Si mund t’i thuhet një nëne dhe babai që po luftonin për jetën e djalit të tyre kështu? Në Suedi kemi shpresa të reja”, thotë motra e Edionit, Adana, 24 vjeç.
Gjendja e tij shëndetësore është përmirësuar. Disa ditë në javë Edioni shkon në shkollën speciale në Finspång dhe nëna e tij Evri pushon. Ndërsa pjesën tjetër të kohës ajo kujdeset për të.
“Ai dëshiron të jetojë jetën, të shkojë në shkollë dhe të marrë trajnim. Kështu ai është i lumtur”, thotë e ëma e djalit.
Sipas “abcnews” tentativë për dëbim ndaj tyre është bërë dhe në vitin 2016, kur u zgjuan në mes të natës nga oficerët e policisë të cilët do t’i shoqëronin me aeroplan për në Shqipëri. Në aeroportin e Tiranës, ata kërkuan kujdes special për Edionin, por u refuzuan kur stafi i ambulancës pa gjendjen e tij. Ndaj familja u kthye në Suedi dhe kërkuan përsëri azil.
“Ne kemi bërë gjithçka mundëm, kemi marrë një vërtetim nga drejtori i spitalit dhe zyrtari kryesor mjekësor. Unë nuk e kuptoj se si këto dokumente zyrtare nuk pranohen”, thotë avokati i familjes, Peter Nordström./E.M
