Trajneri i Ri i Kombëtares Shqiptare, Edi Reja, ka treguar në një intervistë për ‘Corriere dello Sport’ prapaskenat e përzgjedhjes së tij si pasuesi i Panucit, projektin e tij me Shqipërinë dhe disa informacione në lidhje me punën e tij.
Reja ka thënë se ai është kontaktuar fillimisht nga Presidenti Duka, me të cilin ishin takuar më pas në ndeshjen e Shqipërisë me Turqinë. Megjithatë prania në ndeshjen në Turqinë ishte për arsye se trajneri po ndiqte disa lojtarë për Napolin dhe Atalantën.
Për këtë episod Reja përmend edhe diçka që nuk ishte zbuluar më parë. Ai nuk kishte takuar Armando Dukën por edhe Kryeministrin e Shqipërisë Edi Rama, i cili sipas Rejas e kishte takuar në hotel dhe ishte munduar që ta bindte të merrte drejtimin e pankinës kuq e zi.
“E takova atë në hotelin tim pranë “Ponte Milvio”-s, ai erdhi për të parë Lacion, është tifoz i madh i Juventusit. Më kishte thirrur që të më bindte.”
Ai shton se kryeministrit i kishte folur mirë për të edhe Igli Tare. Bashkëpunimin me këtë të fundit ai e vlerëson si gjatë periudhës kur kanë punuar te Lacio si edhe gjatë kohës kur ka filluar punën me Kombëtaren Shqiptare.
“Ma ka ndihmuar shumë, kemi folur për lojtarët, kemi lëvizur nëpër europë për ti parë, Igli ka më shumë njohuri, i mora parasysh vlerësimet e tij.”
Përsa i përket rrugëtimit të Shqipërisë për në Euro2020, Reja është shprehur optimist.
“Përjashto Francën, mendoj se mund të jemi konkurrues më të gjithë, përfshi këtu edhe Turqinë. Do të provojmë gjithçka, respekt për të gjithë, frikë askënd” tha trajneri.
Ndër gjërat që i kanë bërë përshtypje nga grupi i lojtarëve është se janë të motivuar dhe fanella i karikon akoma më shumë. Nga ana tjetër Reja është shprehur se do të punojë po me aq sakrificë që grupi të nxjerrë 100% të kapacitetit.
“Europa është një ëndërr, por nëse dëshirojmë që ëndrrat të bëhen realitet duhet të besojmë, vetëm një gjë e pengon të realizohet, frika, nuk duhet të kemi dyshime.” /Opinion.al
