Kryeministri Edi Rama ka qenw mbrëmjen e djeshme i ftuar nga gazetari Çim Peka në Syri.net që transmetohet online. Ndër të tjera ai është pyetur edhe për origjinën e tij, të cilën Rama e ka shpjeguar me detaje.
Edi Rama: Deri ku është shtrirë pema e familjes tonë? Di tu them se të parët e mi nga babai kanë zbritur nga Berati në Durrës.
Kristaq Rama i Parë është stërgjyshi im, i cili ishte një përfaqësues intelektual i shtresës së mesme të kohës, kishte pasionin e madh për të hapur shkolla të gjuhës shqipe në atë kohë, dhe ka bërë një rrugëtim nga Berati drejt Durrësit, ku ka qenë dhe në shpalljen e pavarësisë, dhe aty më pas përqendrua familja.
Gjyshi, i cili më pas shkoi për të bërë studimet në Itali që të merrte stafetën e të atit, i mori të gjithë paratë e të atit për të bërë shkollën, bleu një super makinë private dhe erdhi pas 6 muajsh dhe përfundoi shofer i kryetarit të bashkisë. Kur vajti kryetari i bashkisë në pritjen e festës kombëtare tek naltmadhnija, naltmadhnisë i mbetën sytë tek vetura dhe kujtoi se ky e kishte blerë me lekët e buxhetit, ndërkohë që ky i thotë se ajo nuk është e ima, është e shoferit, dhe naltmadhnija ja mori shoferin me gjithë makinë kryetarit të bashkisë.
Pastaj historia dihet me tim atë, ai ka lindur në Durrës.
Pastaj nga ana e gjyshes nga babai gjithmonë, gjyshja ka qenë motra e Zef Konomit, ishte vajzë e një martesë të një burri katolik nga Shkodra me një grua e cila kishte lindur në Bosnje, e kishte babain kroat nënë veneciane. Ata u vranë në një aksident kur fëmijët ishin shumë të vegjël dhe gjyshen bashkë e të vëllain i ka rritur kumbari i cili ishte pronari i Grand Hotelit në Shkodër, i martuar me shefen e kuzhinës së Privc Vidit, ajo ishte austriake…
Nëna ime të parët e saj i ka pasur mirditorë. Kanë zbritur nga Mirdita në Vuno, dhe për këtë arsye shumë nga mbiemrat e të ardhurve në Vuno janë bashkime emrash të katolikëve të Mirditës, si Koleka, Ndrenika.
U sqarove se nga jam unë….
