TIRANE-Kush ka besuar së Edi Rama jeton vetëm me rrogën e kryeministrit dhe me të ardhurat e bashkëshortes, do të duhet t’i bëjë edhe një herë llogaritë e kreut të qeverisë. Pasuria e kryeministrit Edi Rama gjatë vitit 2015 është rritur ndjeshëm dhe ajo pritet të reflektohet në deklaratën e ardhshme të pasurisë. Burimi i kesaj pasurie të papritur të kryeministrit të Shqipërise është shitja e punimeve të tij artistike në një nga galeritë me influente të artit kontemporan në Berlin.
Dhe mesa duket, përveç avantazheve si kryeministër, Edi Rama po shijon më në fund edhe suksesin si artist. Për këtë arsye, pak ditë më parë, kryeministri shqiptar mori rrugën përsëri për në Gjermani, këtë herë në Mynih, ku në galerinë Kampl Gallery ka prezantuar 100 piktura. Janë nga ato punime që ai bën në tavolinën e punës kur bisedon me persona të ndryshëm. Por sa kushton një nga këto punime? Gazeta Abendzeitung München shkruan se një prej tyre ka vlerën e 1.500 eurove. Nëse do t’i shesë të gjitha Rama do të arkëtojë rreth 150 mijë euro.
Nuk janë pak për një piktor që nis të shesë vepra të tij në perëndim të ciklit krijues. Por për të shmangur çdo hamendësim, AbcNews udhëtoi në Berlin, në galërinë Michael Schultz, ku në prill të ketij viti Edi Rama postoi vetë në Facebook praninë e tij në hapjen e ekspozitës me 115 punimet e tij. Por ajo çfarë Rama e quan “një kontribut modestisht pozitiv për imazhin e Shqipërise” është njëkohësisht edhe një kontribut për financat personale të kryeministrit shqiptar.
Michael Schultz ka shitur disa prej pikturave të kryeministrit të Shqipërisë. Dhe me një çmim të konsiderueshëm. Shumë para, thotë bosi i galerisë gjermane. Shumë mund të jenë vërtetë dhe kjo është diçka mjaft e mirë për kryeministrin e një vendi të varfër, i cili mund të kompensojë në këtë mënyrë rrogën e tij modeste. Mbetet vetëm që Edi Rama t’i deklarojë këto të ardhura sipas ligjit në deklaratën e tij të pasurisë. Në 16 vitet e fundit, që Rama ka një funksion publik, ai nuk ka deklaruar asnjëherë se ka përfituar financiarisht nga punimet e tij në art. Mesa duket, të qenit një kryeministër artist, po e ndihmon të ketë më në fund sukses edhe në pikturë. Marrë nga ABC News
