Sekretari i përgjithshëm i Partisë Demokratike, Gazment Bardhi ka deklaruar se ministrja e Drejtësisë, Etilda Gjonaj ka shkelur Kushtetutën duke mbështetur kështu akuzën e Presidentit Meta.
Në një status në Facebook, Bardhi shkruan se Gjonaj duhet të japë llogari para drejtësisë dhe në mënyrë ironike shton se dhe sikur Edi Rama të “drejtojë personalisht mbledhjet e SPAK-ut, ajo është e pambrojtshme”.
Ai ka komentuar gjithashtu edhe mbi reagimin e fundit të Gjonajt duke thënë se ministrja duhet të gjejë një avokat dhe jo “të mashtrojë qytetarët”.
LEXO EDHE – Gjonaj i drejtohet Metës: Keni hallin e reformës në drejtësi
Ragimi i plotë i Gazment Bardhit
Në vend që të mashtrojë qytetarët, Etilda Gjonaj bën mirë të gjejë një avokat. Sikur Edi Rama vetë të drejtojë personalisht mbledhjet e SPAK-ut, ajo është e pambrojtshme. Ministrja e Drejtësisë ka shkelur Kushtetutën, ka shpërdoruar detyrën dhe ka marrë pjesë në një akt mafioz për asgjesimin e Gjykatës Kushtetuese.
Provat e paraqitura nga Presidenti për grabitjen e një anëtari të Gjykatës Kushtetuese nga ana e qeverisë, edhe përmes veprimeve të paligjshme të Ministres së Drejtësisë, janë të qarta dhe të pakundërshtueshme. Etilda Gjonaj duhet të japë llogari para drejtësisë! Është një test i rëndësishëm për SPAK-un, i cili do të tregojë, nëse reforma në drejtësi ka dështuar me gjithçka apo jo. /Opinion.al
