Grupi parlamentar gjerman i CDU/CSU ka reaguar për situatën politike në Shqipëri, duke thënë se me veprimet e fundit të opozitës Shqipëria po humbet kredite në sytë e partnerëve europianë.
Në deklaratën e dhënë nga zëdhënësi Florian Hahn, CDU/CSU thotë se deputetët e partisë partnere në Shqipëri, duke iu referuar Partisë Demokratike, po i shërbejnë keq qëllimeve të tyre duke bërë autogol.
“Shqipëria për momentin është duke luajtur shumë me kredibilitetin tek miqtë evropianë. Në rast se perspektiva për çeljen e negociatave për në BE në mesin e vitit të kaluar ishte ende rozë, tani po shfaqen re të zeza. Protestat e aktuale në Tiranë pengojnë qeverinë, si dhe paralizojnë funksionimin e parlamentit. Protestat dhe demonstratat bëjnë pjesë tek të drejtat e njeriut dhe janë një tipar dallues i demokracisë, në rast se ato zhvillohen në mënyrën e duhur. Por deputetët e partive tona partnere në Shqipëri i bëjnë një shërbim të keq (autogol) qëllimit të tyre, nëse nëpërmjet dorëzimit masiv të mandateve do të shkaktojnë një stanjacion politik dhe do të nxisin protesta të dhunshme. Një qëndrim refuzues nuk i shërben as vendit, as qytetarëve. Prandaj ju bëj thirrje miqve tanë në Shqipëri për vetëpërmbajtje. Qeveria dhe opozita duhet të zhvillojnë menjëherë bisedime, në mënyrë që të rifillojë funksionimi i parlamentit dhe të rivendosen marrëdhënie të qarta. Perspektiva evropiane është vënë në rrezik”, thuhet në deklaratën e grupit parlamentar CDU/CSU./Opinion.al
