Ndërkombëtarët janë në një mendje për qëndrimet e tyre ndaj situatës politike në vend. Pas deklaratës së Ambasadës Amerikane në Tiranë për protestën e ditës së nesërme të opozitës, ka reaguar edhe delegacioni i Bashkimi Europian.
Deklarata e tyre është shumë e ngjashme me atë të SHBA-së, ku bëjnë thirrje për protestë paqësore dhe e cilësojnë vendimin e opozitës për djegien e mandateve, si të dëmshëm për procesin e integrimit të vendit.
“Kjo e drejtë është një shtyllë qendrore në çdo shoqëri demokratike, por duhet ushtruar në mënyrë paqësore, pa përdorur dhunën. Asnjë formë e nxitjes së dhunës nuk është e tolerueshme. Ne u bëjmë thirrje edhe një herë të gjithë liderëve të partive që të tregojnë përgjegjësi për të shmangur çdo përshkallëzim gjatë protestave. […]Heqja dorë nga mandatet parlamentare pengon seriozisht funksionimin e demokracisë në Shqipëri dhe ndikon në integrimin e vendit në BE – një perspektivë që e duan plotësisht 93% e qytetarëve shqiptarë”, shkruhet në deklaratë.
Njësoj si SHBA, edhe Bashkimi Europian mbështet kandidatët që kanë pranuar apo do të pranojnë mandatet, duke bërë thirrje që të tejkalohet situata politike në Shqipëri përmes dialogut.
“Ne vazhdojmë të mbështesim ata që janë të angazhuar në procesin demokratik në Parlament, gjithashtu në mbrojtjen e interesave të popullsisë shqiptare që dëshiron të vazhdojë të ecë drejt BE-së. […] Tani është shumë urgjente që të kapërcehet situata politike aktuale duke krijuar një platformë kombëtare për dialog […] Shqipëria ka nevojë për një dialog ndërpartiak për reformat më urgjente, duke përfshirë reformimin e kuadrit ligjor zgjedhor në përputhje me rekomandimet e OSBE / ODIHR-it”, theksohet ndër të tjera në deklaratën e delegacionit të Bashkimit Europian në Tiranë./Opinon.al
