Prokuroria e Prishtinës ka ngritur aktakuzë ndaj një shtetasi i cili ka kërcënuar me jetë deputeten e Partisë Demokratike të Kosovës, Ariana Musliu-Shoshi.
Sipas aktakuzës, i pandehuri më 2 maj 2023 rreth orës 19:00, përmes rrjetit social “facebook”, me dashje dhe me qëllim të frikësimit e ka kanosur seriozisht deputeten Kuvendit të Kosovës, për shkak të detyrës së saj.
Në mesazhin e dërguar deputetes, ky person, identiteti i të cilit nuk bëhet me dije, i thotë: “Sa të vijë me pushime… edhe dy muj i ke jetë midis Prishtinës kam me të masakrue…”.
Ka qenë vetë ligjvënësja e parlamentit të Kosovës ajo e cila ka bërë kallëzimin pranë organeve ligjzbatuese pas kërcënimeve të marra në rrjete sociale.
“Me këtë rast tek e dëmtuara është shfaqur ndjenja e frikës, ankthit dhe e pasigurisë për jetën, andaj me këtë i pandehuri ka kryer veprën penale të kanosjes”, thuhet në dosjen e prokurorisë.
Prokurori i Shtetit i ka propozuar Gjykatës që të pandehurit t’i caktohet masa e paraburgimit, “Arrest me burg” dhe të shpallet fajtor e të dënohet sipas legjislacionit të Kodit Penal.
