Universiteti “Aleksandër Moisiu” në Durrës ka publikuar foton e njërës prej motrave që ndërroi jetë, bashkë me nënën dhe motrën tjetër në Fushë-Arrëz pasi ranë në kontakt me rrymën elektrike.
Bëhet fjalë 18-vjeçaren Sidorela Kola. Teksa i shpreh ngushellimet familjes, Universiteti iu ka bërë thirrje të gjithëve t’i bashkohen nismës për mbledhjen e kontributeve për familjen Kola.
“Me hidhërim të thellë morëm vesh lajmin e ndarjes nga jeta të studentes sonë të shkëlqyer Sidorela Kola, motrës dhe nënës së saj. Kjo tragjedi e madhe ka tronditur shokët, pedagogët, mbarë komunitetin tonë universitar. Shprehim ngushëllimet më të sinqerta për familjen Kola dhe miqtë.
Falenderoj Fakultetin e Biznesit për homazhet që po zhvillojnë për Sidorelën dhe iu bëj thirrje të gjithëve t’i bashkohen nismës së tyre për mbledhjen e kontributeve për familjen Kola.
Mendjet e lutjet tona janë me ta!
Prof. Dr. Kseanela Sotirofski
Rektor”-shkruan Universiteti.
