Jose Mourinho ka mbështetur vendimin e Gareth Southgate për të mbajtur Wayne Rooney si kapiteni i Anglisë dhe ka përsëritur rëndësinë e Wayne Rooney si kapiten i Manchester United, pavarësisht se e ka humbur vendin e titullarit. 30-vjeçari Rooney pritet të jetë sërish në stol, për herë të tretë radhazi kundër Stoke, por kjo nuk ka ndikuar në statusin e lojtarit dhe ndikimin e tij në ekip. “Ai është kapiteni im, kapiteni i klubit, kapiteni i futbollistëve, pavarësisht çfarë ndodh, nëse është në fushë apo jo,” – tha Jose Mourinho, pas ndeshjes ndaj Stoke.
“Jam shumë i lumtur që Gareth vendosi ta mbajë si kapiten, – shtoi Mourinho. – Southgate ka mbështetjen time të plotë, ashtu si e kishte Sam Allardyce, ashtu si e ka pasur Eriksson dhe të gjithë të tjerët kur kam qenë trajneri i Chelsea apo Manchester United. Rooney është shumë i rëndësishëm për ne dhe për Anglinë, për të mos thënë më i rëndësishmi.” Rooney u aktivizua në vend të Ibrahimovic në ndeshjen e fituar në Europa League kundër Zorya, të enjten në mbrëmje, duke ndërtuar golin e fitores. Manchester United ka fituar tre ndeshje radhazi, duke bërë kthesë pas tri humbjeve.
Edhe pse Rooney nuk shënon që nga java e parë dhe është kritikuar nga shtypi, Mourinho beson se kapiteni ka një rol thelbësor në ndërtimin e ekipit dhe në përshtatjen e Pogba dhe Baillly. “Ai është futbollist i rëndësishëm. Do të shënojë në të ardhmen dhe punon shumë për ekipin, – tha Mourinho. – Ai flet me futbollistët e rinj, me futbollistët e ardhur dhe i motivon ata. Atmosfera në dhomat e zhveshjes është shumë e mirë edhe në saj të tij. Wayne nuk ka luajtur në formacion në dy ndeshjet e fundit, por ai i ka fituar të dyja, kësisoj nuk ka asnjë problem.”
