Presidenti Ilir Meta dhe vlerësimin e tij për raportin e Komisionit të Venecias lidhur me emërimet në Gjykatën Kushtetuese i cili u publikua të premten.
Pas analizës me katër pika ku theksoi se Venecia i dha të drejtë arsyetimit të tij për emërimin e Marsida Xhaferllarit në Gjykatën Kushtetuese, presidenti tha se raporti nuk ka kritika ndaj tij.
“Nuk ka asnjë presje në raportin e komisionit të Venecias që kritikon presidentin”, tha Meta dhe shtoi se e vetmja ide që unë nuk kundërshton “moralisht” për ndryshime kushtetuese nga ky Kuvend “është që presidenti të zgjidhet nga populli.”.
Ndër të tjera Presidenti deklaroi se një çështje e tillë nuk duhet të kishte shkuar kurrë në Venecia pasi ajo ishte “tepër e qartë” dhe se Komisioni i Venecias “ka shkruar Kushtetutën” tonë aq më tepër sa i përket zgjedhjes së Gjykatës Kushtetuese. Por Meta nënvizoi se megjithëse ishte e lehtë kjo çështje ka zgjatur më shumë në kohë.
“Është çështja që ka zgjatur më shumë se çdo çështje tjetër megjithëse ishte çështja më e lehtë. Janë bërë 5 drafte por këto pika kanë mbetur po kështu. Një falënderim të gjithë shqiptarëve që në 2 mars patën besim te Presidenti i Republikës dhe u bashkuan me të për ti thënë ndal kapjes së institucioneve të vendit.”, deklaroi Meta.
Sa i përket raportit të Venecias lidhur me ligjin “anti-shpifje”, Meta tha se ai është i rrëzuar dhe e cilësoi si akti të paprecedent
“Ka ndodhur një akt i paprecedent sepse Këshilli i Europës e ka çuar në Venecia. As nuk duhet vënë në diskutim që ai është rrëzuar.”./ Opinion.al
