Presidentja e Kosovës Vjosa Osmani, ka mbajtur fjalimin vjetor këtë të mërkurë para pjesëtarëve të Forcës së Sigurisë së Kosovës.
E veshur me rroba ushtarake, Osmani gjatë fjalimit të saj në Komandën e Forcave Tokësore në Istog tha se në kohën kur arkitektura e sigurisë po sfidohet e atakohet, forcimi i kapaciteteve mbrojtëse është domosdoshmëri.
Komandantja supreme para ushtarëve të vendit tha se duhet më shumë se kurrë devotshmëri ndaj atdheut, vigjilencë dhe përkushtim.
“Viti që po lëmë pas u përcoll me sfida jo vetëm për ne, por edhe për botën. Duhet të jemi të vetëdijshëm që sfidat do të rriten krahas me përpjekjet për ta sfiduar paqen dhe rendin botëror nga regjimet autoritare hegjemoniste. Prandaj, më shumë se kurrë na duhet devotshmëri ndaj atdheut, vigjilencë e përkushtim që Republikës t’i bëhemi gardianë”, tha Osmani.
Ndër të tjera Osmani nënvizoi se gatishmëria e ushtarëve të Kosovës për ta mbrojtur vendin nga çdo rrezik i bën krenarë të gjithë.
“Kjo gatishmëri e juaja për ta mbrojtur vendin nga çdo rrezik na bën krenar secilin. Është nder e privilegj sa herë jam në mesin tuaj. Mbi të gjitha djemtë e vajzat e forcës sonë janë të gatshëm për të mbajtur integritetin territorial e sovranitetin e shtetit tonë. Ju shqyheni për përkushtimin ndaj vendit, për nivelin profesional, për disiplinë e përkushtim ndaj ndaj detyrës, për nderin ndaj vendit tuaj. Kjo na bën krenar ne si shtet”, tha ajo.
