Mbrëmjen e djeshme rreth orës 20:00 u shpërndanë me shpejtësi disa pamje, ku dukej fadroma që shembte 2 shtëpi. Disa media raportuan se kanë nisur shembjet tek Unaza e Re, e cila tashmë është një zonë konflikti mes banorëve dhe policisë. Ky lajm u perhap edhe nga Kryetari i Bashkisë Erion Veliaj në profilin e tij në Twitter i cili falenderonte dy familjet që liruan shtëpitë për ti hapur rrugë ndërtimit të Unazës së Madhe.
Por mëngjesin e sotëm gjithçka doli në dritë. Shembjet e natës nuk janë në zonën e nxehtë të Unazës së Re (Astiri) por disa metra më larg, në pjesën e sipërme të rrethrrotullimit të Shqiponjës. Ekzaktësisht tek ish-Pularia (pranë AMC).
Banorët e Astirit reaguan të revoltuar që mbrëmë dhe thanë se “nuk ka shembje dhe këtë mashtrim po e bën Erion Veliaj”.
Opinion.al kontaktoi sot zyrtarisht Inspektoratin Kombëtar të Mbrojtjes së Territorit (IKMT) dhe mësoi se nuk ka ende asnjë plan për shembjen e banesave apo bizneseve në zonën e Astirit (Unaza e Re). “Ne jemi me plan pune në zonën e Shkozës, dhe nuk ka ende vendim për Unazën e Re”, tha zëdhënësi i këtij institucioni.
Tashmë është e qartë dy objektet në fjalë që u shemben mbrëmë janë në Laprakë dhe aksioni është kryer nga Inspektoriati i Mbrojtjes së Territorit (IMT) në varësi të Bashkisë së Tiranës.
