Sekretari i Përgjithshëm, njëherësh kryetar i grupit të PS-së, Taulant Balla, po tenton të mbledhë vetë prova se nuk ka qenë në Fushë-Krujë më datë 21 korrik 2018, ditë kur n/komisar Emiljano Nuhu akuzon se është kërcënuar në zyrën e tij.
Përmes një shkrese zyrtare, deputeti Balla kërkon zbardhjen e qelizës telefonike të tij gjatë 24 orëve të datës 21 korrik. Burime të ABC News konfirmuan se shkresa zyrtare e Ballës ka mbërritur në kompaninë celulare në të cilën është abonent. Objekti i kësaj kërkese është zbardhja e vendodhjes së qelizës telefonike të aparatit të tij celular për datën 21 korrik, datë kur Nuhu pretendon se Balla ka qenë i pranishëm në zyrën e tij në Stacionin Policor të Fushë Krujës.
Sipas kërkesës; Balla kërkon evidentimin e lëvizjeve të tij, bazuar në pasqyrimin e antenave telefonike, për gjithë harkun kohor prej 24 orësh të kësaj date. Pas denoncimit publik të bërë nga ish-oficeri i Policisë, Emiliano Nuhu, përmes një interviste ku pretendonte se ishte kërcënuar në prani të deputetit Balla, ky i fundit mohoi kategorikisht këtë fakt.
Kujtojmë se numri II i PS ka dorëzuar kallëzim në prokurori për liderin demokrat, Lulzim Basha, oficerin Emiljano Nuhu dhe gazetarin Basir Çollaku. Kësisoj duhet të jetë prokuroria ajo që mbledh prova se ku ka qenë Balla më 21 korrik dhe jo vetë zyrtari i lartë i PS-së.
/Opinion.al
