Detaje të reja janë zbuluar në lidhje me vrasjen dhe murosjen e shqiptarit Astrit Lamaj në Itali në janar të vitit 2019. Duket se vendimin për t’u ndarë nga 64-vjeçarja Carmela Sciacchitano dhe për t’u lidhur me një grua më të re, e ka paguar me jetë.
Lamaj, i cili ishte me precedentë penalë në Itali për shpërndarje lëndësh narkotike, u vra dhe më pas u muros nga pesë persona, mesa duket të porositur nga Carmela Sciacchitano. Ajo, megjithëse nuk rezulton me precedentë penalë, njihte shumë eksponentë të botës së krimit. Mësohet se u ka kërkuar ndihmë miqve siçilianë, të cilët pasi e kanë tërhequr Lamajn pranë një varreze, e kanë lidhur dhe e kanë rrahur barbarisht, deri sa e kanë mbytur me një spango. Më pas, e kanë murosur pranë një vile të vjetër dhe janë rikthyer në Siçili.
Carmela Sciacchitano është arrestuar nga karabinierët në aeroportin e Xhenovës, ku kishte prerë një biletë për në Brazil. Gjithashtu janë arrestuar vëllezërit Carmelo dhe Angelo Arlotta, Francesco Serio, Giuseppe Cammarata dhe Cosimo Mazzola./Opinion.al
