Portugezi ndërkombëtar ka lënë një mesazh në Twitter, shoqëruar nga një foto me Bruno Alves, Pepe dhe José Fonte, duke festuar fitoren në “Euro 2016”. Jo shumë e ngadaltë ka ardhur, kësisoji, përgjigjja e Cristiano Ronaldos ndaj Jose Mourinhos. Pasi trajneri portugez ka thënë se “kontributi i Ronaldos në minutat e fundit (finalen ndaj Francës) të “Euro 2016” ishte asgjë, lojtari i Real Madridit ka reaguar me anë të një mesazhi në llogarinë e tij zyrtare në Twitter. “Një kujtesë e shpejtë”, këto ishin fjalët e publikuara nga lojtari, të cilat vijnë të shoqëruara nga një foto me trofeun e kampionit të Europës.
Përplasjet – Jose Mourinho dhe Cristiano Ronaldo tanimë nuk ndahen vetëm nga kilometrat, por edhe nga ndjenjat. Kështu u duk sidomos në deklaratën e parafundit të teknikut, ku nuk e përfshiu ish-lojtarin e tij në listën e futbollistëve më të mirë në histori, por Lionel Messin po, pikërisht rivalin e përhershëm të 31-vjeçarit. Deklarata e fundit e të vetëquajturit “The Special One” është më e ftohtë dhe objektive, me siguri pa të keq, por, gjithsesi, një formë kritike për sulmuesin. Kësaj here “Mou” e “goditi” Ronaldon te pika e dobët: kombëtarja.
Tekniku portugez vazhdoi me kritika ndaj bashkëpatriotit të tij. “Cristiano humbi kontrollin emocional, por kjo nuk është diçka e keqe. Ajo që përvoja ime më thotë është se në minutat e vendimeve të rëndësishme, lojtarët përfshihen në botën e tyre.” Një nga shokët e skuadrës së Ronaldos, Eliseu, pas suksesit në “Euro 2016” zbuloi se “Cristiano sillej si një fëmijë në dhomat e zhveshjes”. Faktikisht, sjellja e sulmuesit të Real Madridit është kritikuar nga emra të tjerë, si Antonio Simoes, i cili në deklaratat e tij për “Efe” theksonte se gjestet e kapitenit ishin një ndërhyrje në punën e trajnerit Fernando Santos.
I pyetur për reagimet gati-gati të çuditshme të yllit portugez në minutat e fundit të finales së Kampionatit Europian, Portugali-Francë (1-0 me shtesë), Mourinho theksoi se ecejaket dhe brohoritjet e Ronaldos nuk sollën asgjë të mirë për skuadrën. “Cristiano e humbi paksa kontrollin e emocioneve. Ai nuk bëri ndonjë gjë të keqe, por mendoj se as nuk i solli gjë skuadrës në minutat e fundit të finales. Aty ishin 11 vetë dhe ai që dirigjonte ekipin ishte trajneri. Unë e shoh këtë si një goditje emocionale të dikujt, i cili pa se duheshin edhe pak minuta për të arritur një objektiv, që e donte gjithë bota”, – komentoi trajneri i Manchester Unitedit në një intervistë në “Sport TV”, e vlefshme për gazetën portugeze “Record”.
