Rreth orës 14:00 të së martës avioni i “Austrian Airlines” zbriti në Rinas. Në bordin e avionit ishte presidenti Ilir Meta si dhe një ish-zyrtar i lartë. Aeroporti ka qenë nën masa të forta sigurie, ndërsa Garda e Republikës priste kreun e shtetit pas përfundimit të vizitës zyrtare.
Po ashtu pak orë më vonë nga Rinasi do të nisej dhe zyrtari i DASH, i cili qëndroi për një vizitë dy ditore në Shqipëri.
Autorët kanë hyrë në pistën e Rinasit rreth orës 15:00 të se martës, pikërisht në kohën kur thuajse kishte përfunduar ngarkimi i thasëve me para të katër bankave të nivelit të dytë që operojnë në Shqipëri.
Nën kërcënimin e armëve grabitësit kanë marrë thaset me para në pjesën e kargos së avionit. Bëhet fjalë për disa miliona Euro ishin ngarkuar në një avion të linjës Tiranë – Vienë dhe transportuar nga një makinë e kompanisë “Nazeri 2000”.
Grabitësit kanë hyrë me një furgon me logon e “Hetimit Tatimor” me targa false nga ana e parkingut 24 orësh të pasagjerëve dhe kanë dalë nga kjo portë në krah të rrugës Rinas – Fushë Krujë, porta e zjarrfikësve, e njëjta nga ku 3 vjet më parë hyri edhe një Mercedes që u përdor për një grabitje të ngjashme.
Disa pasagjerë të avionit dëshmuan se grabitësit u vendosën armët në kokë punonjësve të policisë private. E njëjta gjë konfirmohet edhe nga kamerat e sigurisë, ndërsa nga veprimet e autorëve duket se çdo gjë ka qenë e mirëmenduar edhe përplasja me armë më policinë.
Pas rreth 800 metrash pasi kanë dalë nga pista, grabitësit janë përballur me blutë, të cilat ndodhen të stacionuar pranë aeroportit. Ata kanë qëlluar me armë ndaj efektivëve, të cilët u kundërpërgjigjën.
Nga shkëmbimi i zjarrit mbeti i vdekur njëri nga grabitësit, në afërsi të urës së Tapizës. Ai është identifikuar zyrtarisht këtë të mërkurë si Admir Murataj, protagonist dhe organizator i të paktën tre grabitjeve të tjera të parave të bankave, dy në 2015-n dhe një 2017-n, për të cilën vetëm pak kohë më parë u dënuan 8 persona.
Pasi dogjën furgonin, në vendin ku pati dhe luftë me policinë teksa u përdorën dhe granata, autorët e grabitjes lanë trupin e Admir Murataj dhe u larguan me një tjetër automjet, tip Benz.
Dyshime të forta se nga përplasja me armë dhe një tjetër grabitës ka mbetur i plagosur. Edhe këtij automjeti autorët i vunë flakën, ndërsa sërish ndërruan makinë. Automjeti i tretë u gjet sot plotësisht i djegur në një tunel në Tapizë.
Në mjetin e djegur është gjetur dhe një arsenal armësh automatike dhe granata. Sipas hetuesve, kjo tregon se autorët kanë qenë të përgatitur për më të keqen, një përplasje me armë me blutë. 40 persona janë shoqëruar në polici dhe po merren në pyetje, ndërsa janë lëshuar dhe 4 urdhër-ndalime. Veç grabitjes së shumës së madhe të parave dhe vrasjes gjatë shkëmbimit të zjarrit, kjo ngjarje vë dhe njëherë në dyshim sigurinë e aeroportit të vetëm ndërkombëtar të Shqipërisë. Policia e Rinasit thotë se përgjegjëse për sigurinë në perimetrin e brendshëm është kompania ICTS.
Vëllai i Admir Muratajt: Shokët e lanë në rrugë
Cen Murataj mohon që vëllai i tij Admir Murataj të ketë qenë organizator i grabitjes së ndodhur të martën në Aeroportin e Rinasit. Duke iu përgjigjur pyetjeve të gazetarëve jashtë morgun në Tiranë, ai kërkoi zbardhjen e ngjarjes nga policia. Ndonëse zyrtarisht policia tha se Murataj u vra gjatë shkëmbimit të zjarrit me autoritetet, vëllai i tij bën fajtorë 4 bashkëpunëtorët e tjerë në grabitje, të cilët mundën të arratiseshin.
Ai thotë se një organizator nuk ka sesi vritet dhe shprehet se shokët e lanë vëllain ei tij në rrugë. Murataj shkon më tej, duke thënë se do t’i gjejnë vetë shokët, nëse nuk i gjen policia.
Kush ishte Admir Murataj?
Admir Nikaj apo Admir Murataj me banim në Prezë është nga Tropoja dhe prej disa vitesh ishte në kërkim për disa nga grabitjet më të bujshme të parave në Shqipëri. Por, Murataj, i cili gjatë jetës së tij ka përdorur edhe identitete të rreme, kërkohej edhe nga drejtësia greke, si i arratisur nga burgu i Trikallës 6 vjet më parë, ku ishte dënuar për vjedhje bankash me armë.
Pas arratisjes, u kthye në Shqipëri ku nisi një seri grabitjesh që kishin si objektiv bankat dhe transportimin e parave të tyre. Vjedhja e parë ka ndodhur në 3 dhjetor të 2015, në aksin rrugor Qafë Kashar-Rinas, në afësi të kryqëzimit të fshatrave Bërxullë dhe Domje, ku u vodhën paratë e një banke të nivelit të dytë.
Vjedhja e dytë ndodhi më 9 shkurt 2017, ku iu zu pritë një blindi që transportonte para’ në Rinas. Natyra e krimeve për të cilat ishte dënuar dhe mbi të gjitha metodat e vjedhjes që përdoreshin nga Murataj më pas në grabitje të cilave deri këtë të martë arriti t’u shpëtonte, e kishin bërë atë një individ me rrezikshmëri të lartë.
Pak kilometra më larg aeroportit ndërkombëtar të Rinasit ai u vra të martën, ndërsa në fytyrë mbante një maskë dhe në trup iu gjetën eksploziv dhe granata. Ekspertiza ligjore tani është duke verifikuar se kush e vrau grabitësin. Policia lajmëroi një ditë më parë se ai mbeti i vrarë gjatë përplasjes me ta disa qindra metra larg aeroportit./Opinion.al
