Policia e Krujës ka nisur procedim penal ndaj një 38-vjeçari të sëmurë mendor, me akuzën se “ka prishur qetësinë”.
Ngjarja e rrallë ka ndodhur gjatë pasdites së djeshme në Krujë, më konkretisht në kopshtin numër 4 të qytetit, ku Partia Socialiste zhvillonte një takim elektoral. Por, ndodhi një e papritur.
38-vjeçari E.R., i sëmurë mendor, është futur në oborrin e kopshtit nr. 4, ku kishte takim elektoral subjekti politik Partia Socialiste, duke prishur qetësinë, bënë me dije burime nga policia. 38-vjeçari rezultoi se ishte edhe në gjendje të dehur, shtuan të njëjtat burime.
Efektivët e policisë kanë ndërhyrë duke bllokuar dhe shoqëruar 38-vjeçarin. Ndaj tij, policia ka nisur një hetim për veprën penale: “Prishja e qetësisë publike” dhe ia ka referuar materialet hetimore Prokurorisë së Krujës.
