Një ngjarje e rëndë ka ndodhur në Itali, ku një shqiptar ka vrarë me sëpatë një 63-vjeçare në Noriglio, një fshat i Rovereto.
Sipas mediave italiane raportohet se ngjarja ka ndodhur mbrëmjen e së premtes, ku një 48-vjeçar me origjinë shqiptare, fqinj i viktimës, priti jashtë shtëpisë infermieren, e cila kishte dalë në pension.
Autori e goditi atë dy herë me sëpatë, duke i shkaktuar lëndime vdekjeprurëse në kokë dhe fytyrë.
Gruaja u vra para syve të nënës së saj 80-vjeçare, djalit të saj 30-vjeçar dhe disa familjeve që ishin në rrugë në atë moment.
Ndërkohë, autori është vetëdorëzuar pas krimit.
Vrasja ka ndodhur pas sherreve të vazhdueshme që kishin me vite të tëra, me kërcënime, ofendime dhe ankesa. Mara Fait ishte sulmuar edhe më parë nga autori. Dje ajo po kthehej nga supermarketi pasi kishte bërë pazar me nënën e saj të moshuar dhe të sëmurë.
Në vitin 2015 ajo ishte gjithashtu kandidate për Bashkinë e Rovereto, në listën e Marco Zenatti “Project Rovereto City”.
