Kryeministrja e Britanisë, Teresa May, menjëherë pas sulmit terrorist të ndodhur mbrëmjen e djeshme në Londër është shprehur se “është mbushur kupa”. Ajo dënoi ashpër sulmin e ndodhur dje në Londër ku humbën jetën 7 persona dhe janë plagosur 48 persona të tjerë.
Si ndodhi ngjarja?
Në orën 22:00 me orën lokale të Britanisë, një furgon i bardhë, sulmoi këmbësorët në London Bridge, dhe më pas tre burra sulmuan me thikë disa persona në një lokal pranë Borough Market. Të tre sulmuesit mbartnin xhaketa me bomba të rreme u vranë nga policia menjëherë pas ngjarjes. Dëshmitarët okularë u shprehën se mbrëmjen e së shtunës vunë re një furgon të bardhë i cili po ecte me shpejtësi drejt urës së Londrës dhe shtypi të gjithë këmbësorët që kishte përpara dhe më pas u përplas në afërsi të një lokali. Më pas mësohet se nga furgoni kanë dalë 3 persona të cilët filluan menjëherë të sulmonin njerëzit që ndodheshin të ulur nëpër baret e vendit. Zona në të cilën ndodhi sulmi, është një zonë tejet e populluar nga njerëzit gjatë periudhës së verës. Njerëzit e tmerruar filluan të vraponin sa më parë dhe shumë prej tyre morën metrot që ndodheshin afër në mënyrë që të shpëtonin. Një dëshmitar tregon për BBC se pa një grua e cila u ther me thikë rreth 10-15 herë nga terroristët, të cilët bërrtisin “kjo është për Allahun”. Pas 8 minutash nga sulmi, të tre terroristët u qellun për vdekje nga policia.
Masat paraprake
Britania e Madhe është përfshirë nga sulmet terroriste 3 herë brenda 3 muajve. Sulmi i parë ndodhi në muajin mars ku humbën jetën 5 persona në Ëestminster, pasi u sulmuan me thikë. I dyti ndodhi në muajin maj në Manchester, ku humbën jetën 22 persona dhe 69 të tjerë mbetën të plagosur, ndërsa i treti ndodhi mbrëmjen e djeshme në zemër të Londrës. Teresa May është shprehur se do të rishikohet edhe njëherë strategjia e ndjekur për parandalimin e këtyre sulmeve terroriste. Politikanët e partive të ndryshme kanë ndaluar për disa kohë fushatën elektorale në Britani si pasojë e këtyre sulmeve. Rreth 80 mjekë të specializuar i janë shtuar spitaleve për t’i ardhur në ndihmë të plagosurve. Situata në Londër është e tensionuar. Forca të shumta policie ndodhen në të gjithë vendin. Njerëz të shumtë ndodhen pranë komisariateve të policisë për të marrë informacione në lidhje me njerëzit e tyre të dashur. Ura e Londrës paraprakisht është e mbyllur./Opinion.al
