Mbrëmjen e djeshme u vranë në një atentat mafioz në qendër të Vlorës drejtori i OSHEE-së, Roland Saliu 44 vjeç dhe biznesmeni i njohur Erven (Mirvjen) Hyseni 40 vjeç. Deri tani nuk ka asnjë gjurmë të autorëve, ndërsa janë shoqëruar në polici 20 persona për tu marrë në pyetje.
Një makinë parkoi përpara hotel Vlora në sheshin e Flamurit rreth orës 19:45 të mbrëmjes së të mërkurës. Autori i veshur sportiv dhe me kapele doli me automatik dhe iu drejtua tavolinës ku ishin ulur Saliu e Hyseni në pjesën e jashtme të kafes së hotelit.
Nga të dhënat e para dyshohet se shënjestra ishte pikërisht pronari i hotel “Vlora” dhe i një televizioni lokal me të njëjtin emër i njohur, Erven Hyseni. Me këtë emër njihet biznesmeni në Vlorë, por familjarët në lajmërimin e vdekjes kanë nxjerr emrin Mirvjen Hyseni.
Drejtori i OSHEE që dyshohet se u vra aksidentalisht, humbi jetën menjëherë, ndërsa biznesmeni humbi jetim disa minuta më pas në spital. Kjo ngjarje rëndë mund të rrezikonte jetën edhe të shumë qytetarëve që kishin mbushur sheshin dhe lokalin në qendër të Vlorës kur ndodhi ngjarja.
Aty ka mbetur edhe një biçikletë e vogël…që siç thonë gazetarët e Vlorës është e vajzës së mitur të Erven Hysenit që po lozte përpara hotelit të të atit dhe që mendohet që ka parë skenën e rëndë.
Po kështu në kafe kanë qenë edhe familjarë të tjerë të viktimave dhe të njohur të tyre siç e dëshmojnë pamjet e mëposhtme.
Hetimet dhe të shoqëruarit
Policia e Vlorës ka shoqëruar në komisariat 20 persona, të dyshuar se mund të kenë dijeni ose lidhje me vrasjen e drejtorit të Operatorit të Shpërndarjes së Energjisë Elektrike, Roland Saliu dhe pronarit të hotelit Erven (Mirjen) Hyseni.
Gjithashtu, ka filluar dhe marrja në pyetje e dëshmitarëve që ishin të pranishëm në vendngjarje në çastin e atentatit. Policia, me specialistët e saj antikrim, ka përpiluar edhe një herë dinamikën e ngjarjes dhe saktëson se autori dyshohet të ketë qenë rreth 35 vjeç dhe i veshur sportiv. Qetësisht, autori ka qëlluar me kallashnikov në zonën më të populluar, duke marrë dy jetë njerëzish, ndërsa kalimtarë të rastësishëm, apo qytetarë që po konsumonin kafe, nxituan të ruanin veten dhe fëmijët.
Burime nga policia bëjnë të ditur se autorët pas krimit kanë kaluar nga rruga Muze për të dalë më tej drejt qytetit dhe më pas kanë dalë në autostradë ku aty kanë djegur edhe automjetin.
Autorët e vrasjes së Erven Hysenit dhe Roland Saliut në Vlorë kanë përdorur një makinë BMW. Pasi qëlluan me breshëri në drejtim të lokalit ku ndodheshin dy viktimat, ata u larguan me shpejtësi dhe më pas braktisën makinën në fshatin Panaja, tha policia.
Skeda e viktimave
Viktima e parë Roland Saliu, 44 – vjeç, i cili mbante detyrën e Drejtorit të OSHEE -së Vlorë është emëruar në këtë post në vitin 2015. Më parë ai ka ushtruar detyra të ndryshme, si inxhinier pranë Koorporatës Elektroenergjitike.
Erven Hyseni, 40 – vjeç (i lindur më 29.01.1977) ishte pronar i “Hotel Vlora” dhe televizionit lokal “Vlora Channel”.
Dyshimet e policisë
Nuk ka ende një pistë të mirëfilltë të hetimeve por dyshimet e para flasin për larje hesapesh pasi atentati ka qenë i mirëorganizuar. Autori pasi zbrazi armën te “Sheshi i Flamurit” ka dalë jashtë Vlorës, duke djegur makinën pranë fshatit Panaja.
Kamerat e sigurisë kanë regjistruar të gjithë momentin e ngjarjes, ndërsa pamjet filmike janë sekuestruar nga policia dhe po punohet për identifikimin e autorëve.
Dyshohet se shënjestër e atentatit ka qenë biznesmeni i njohur në Vlorë, Hyseni. Ai kishte lidhje gjaku Haki Rakipin një nga tre viktimat e masakrës së Çoles.
Masakra e Çoles ndodhi në prill të vitit 2015, kur pas një sherri në kazino mbetën të vrarë shtetasit Albi Limaj, Haki Rakipi dhe Ardi Velaj.
Policia arrestoi si autorë të masakrës Aleksandër Llanaj, Ani Begaj dhe Bertil Aliaj. Gjatë seancave të gjata, u dënua me burgim të përjetshëm Aleksandër Llanaj, ndërsa Ani Begaj dhe Bertil Aliaj u dënuan me nga 35 vjet burg në mungesë.
Familjarët e viktimave kanë lëshuar sa herë akuza për padrejtësi në gjykim, e vetëm pak ditë më parë i dërguan letër me shqetësimin e tyre, presidentit Bujar Nishani.
/Opinion.al
