Bill Gates ka reaguar lidhur me pandeminë e koronavirusit. Ai iu ka bërë thirrje njerëzve që të qëndrojnë të qetë teksa theksoi se disa parashikime negative janë të tepruara.
Sipas miliarderit, në vend të 18 muajve derisa të zhvillohet vaksina, kriza e Covid-19 mund të zgjasë nga 6 deri në 10 javë.
Ai parashikoi se nëse një vend bën një punë të mirë në testimin e njerëzve dhe respekton masat e distancimit social, do të nisë ringritja.
“Duhet të qëndrojmë të qetë, edhe pse në një situatë të paprecedentë. E rëndësishme është të respektojmë thirrjen për të qëndruar mbyllur në shtëpi, në mënyrë që të mos përhapim virusin dhe që të ulet numri i të infektuarve. Kështu do të kthehemi në normalitet”, tha Gates në Reddit.
Kujtojmë se 5 vjet më parë në një nga diskutimet e tij në publike në Ted, Bill Gates kishte parashikuar saktësisht atë që po ndodh sot me koronavirus. Gjatë këtij diskutimi, mbi rreziqet që mund t’i kanoseshin globit në dekadat që do të vinin shpejt, Gates nuk fliste për armë bërthamore, por për viruse.
“Ne kemi investuar shumë në armët bërthamore, por shumë pak në një sistem që do të mundte të ndalonte një epidemi. Ne nuk jemi gati për epideminë e radhës”, thotë ai.
Më tej, duke iu referuar rastit të ebolës, të cilin thotë se e ka analizuar, Gates del në përfundimin, se “dështimi për t’u përgatitur mund ta lejojë epideminë e radhës të jetë më dramatike se ebola.
“Ne mund të kemi një virus ku njerëzit mund të ndjehen mirë edhe pse janë të infektuar. Ata e marrin atë në avion, ose në market. Burimi i virusit mund të jetë epidemi natyrale si ebola, ose mund të jetë bioterrorizëm. Pra ka gjëra që do ta bënin situatën shumë herë më të keqe. Le të shohim një model virusi të përphapur përmes ajrit, si gripi spanjoll në vitin 1918. Ja çfarë do të ndodhte. Ai do të përhapej nëpër botë shumë shumë shpejt. Dhe ne do të kishim më shumë se 30 milionë persona të vdekur nga kjo epidemi. Ky është një problem serioz”, ka thënë Gates në fjalimin e tij tashmë viral në të gjithë botën./Opinion.al
