Amur është një tigër siberian dhe që prej tre vjetësh jeton në “Primorski Safari Park”, në Vladivistok të Rusisë. Ndërkohë, Timur është një dhi kurajoze që ishte përcaktuar të bëhej një vakt ushqimi për felinin gjigand.
Kjo është një histori e pazakontë, që po trondit instinktin kafshëror. Amur disa muaj më parë nuk kishte treguar asnjë shenjë dhembshurie për kafshët e gjalla që futeshin në vendin ku mbahej tigri. Brenda pak minutash, preja e tij vritej.
Nëntorin e kaluar, i njëjti fati duhej t’i përkiste edhe Timur. Kur dhia pa tigrin, nuk tregoi asnjë shenjë frike. Ajo iu afrua dhe Amur nuk bëri asnjë lloj reagimi.
“Ishte njësoj, sikur tigri të ishte turbulluar nga guximi i dhisë. Kishte ndodhur edhe një herë tjetër që një dhi i ishte afruar tigrit, por kafsha nuk tregoi asnjë lloj shenje dhembshurie dhe e vrau në moment. Situata tani është ndryshe, kafshët janë bërë miq me njëri-tjetrin dhe nuk ndahen për asnjë moment”, shpjegoi Dmitry Mezentsev, përgjegjësi i parkut.
