Në hotelin “Dar” në Kenia situata ka qenë vërtet kaotike, por edhe qesharake gjatë fundjavës së kaluar. Në recepsion ka mbërritur gjyqtari i njohur kenian i basketbollit Ambrose Kisoi, por një nga punonjësit e hotelit e ka ngatërruar me sprinterin xhamajkan Usain Bolt. Kaq ka mjaftuar që situata të dalë jashtë kontrollit në qytet për disa orë, pasi lajmi mori dhenë: Në hotel ka mbërritur sprinteri xhamajkan, njeriu më i shpejtë në botë. Jashtë hotelit kishte qindra persona që donin të hynin për të takuar Bolt.
Ndërsa brenda situata ishte edhe më kaotike, me karrige të rrëzuara për të hyrë në zonën “vip” të hotelit, ku personi që konsiderohej si “Bolt” ishte ulur në karrige dhe po trajtohej me shumë delikatesë nga stafi i hotelit. Menjëherë kanë nisur “selfie” me gjyqtarin, që edhe vetë nuk e ka kuptuar se përse bëhej fjalë. Por më vonë, kur ai zgjati pasaportën dhe u kuptua identiteti i tij, të gjithë mbetën të zhgënjyer. Gjyqtari Kisoi tha se ishte një keqkuptim, teksa ishte ngatërruar me Usain Bolt.
