Një 29-vjeçar është arrestuar nga policia pasi nuk ka pranuar t’i nënshtrohet kontrollit policor dhe ka goditur efektivin e policisë.
“Specialistët për Hetimin e Krimit në Komisariatin e Policisë Nr. 2 bënë arrestimin në flagrancë të shtetasit E. A., 29 vjeç, pasi në rrugën “Ndre Mjeda”, ka kundërshtuar dhe goditur për shkak të detyrës punonjësit e Policisë, për të shmangur kontrollin fizik ndaj tij”, njofton policia.
Po ashtu, autoritetet bëjnë me dije se po hetohet në gjendje të lirë, 22-vjeçari S.Xh., me detyrë administrator në godinat e Qytetit Studenti, pasi akuzohet për veprën penale “Korrupsioni pasiv i personave që ushtrojnë funksione publike”. Policia e Tiranës informon se i riu do hetohet pasi akuzohet se i ka marrë një shumë parash një studenti, për regjistrimin në një nga këto godina.
Gjithashtu, policia informon se u arrestua në flagrancë shtetasi A. N., 48 vjeç, pasi në rrugën “Demokracia”, u kap duke drejtuar mjetin pa lejen përkatëse. Ndërsa, E. B., 26 vjeç, G. I., 36 vjeç, A. B., 46 vjeç, dhe E. B., 32 vjeç, janë vënë në pranga pasi janë kapur duke drejtuar makinën në gjendje të dehur.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore./ Opinion.al
