E mbani mend Aida Shtinon? Moderatorja rikthehet me disa rrëfime të pa thënë: Më kërcënonin trafikantët
Të gjithë e kujtojnë emisionin “Njerëz të humbur”, nga Aida Shtino. Pas 3 vitesh heshtje, ajo ka folur sot në emisionin “Pasdite në Top Channel”, ku ka rrëfyer për herë të parë disa të pa thëna nga emisioni i saj. Prezantuesja e njohur e emisionit “Njerëz të humbur” ka treguar detaje mbi jetën personale dhe se me çfarë po merret aktualisht.
“Kjo periudhë 3-vjeçare ishte pushim, analizë me veten time dhe një lloj reflektimi”, shprehet Shtino.
Kthimin në Shqipëri pas 13 vitesh në Greqi, gazetarja e kujton kështu:
“Sapo ishte zhvilluar ndeshje Shqipëri-Greqi, ku ne fituam dhe andej u acaruan marrëdhëniet. Djali më erdhi nga shkolla duke qarë një ditë e më tha që e kishin ngacmuar ngaqë ishte shqiptar. Aty diskutuam dhe menduam të ktheheshim. E nisa karrierën te Telenorba, në emisionin “Ku je”. E nisa pas kuintave, me organizimin e emisionit, por vajza që e prezantonte e la emisionin dhe më provuan mua.
Aida thekson se “historitë e njerëzve në atë emision më kanë bërë njeri më të mirë”, por kujton se ka pasur edhe kërcënime.
“Kam marrë kërcënime, sidomos kur kërkonim vajza të humbura, pasi hasnim në rrjete trafikantësh. Një herë, në zyrë më kishte ardhur një letër ku shkruhej se vajza që kërkonim ndodhej në adresën e shtëpisë sime. Aty u alarmova dhe kam njoftuar policinë”, kujton Shtino.
Ndër të tjera ajo ka treguar edhe arsyet pse emisioni ndaloi së transmetuari duke u shprehur se nuk ishte vendimi i saj.
“’Njerëz të Humbur’ është si një fëmijë i rritur me shumë dashuri me shumë përkushtim. I kam përkushtuar gjithë jetën time. Më shumë rrija në punë sesa me familjen time. Madje djali më thoshte ‘i gjete gjithë të humburit, po mua…’ Duke marrë parasysh që ‘Njerëz të Humbur’ kishte pas një armatë të tërë, një strukturë. Databazën më të madhe të njerëzve të humbur e kishim ne dhe sigurisht që nuk do të doja asnjëherë të ndërpritej. Kjo ndërprerje nuk është bërë për fajin tim. Shpresoj, sepse njerëzit janë të interesuar, të hapet një dritare televizive që të rifillojmë edhe më fuqishëm. […] Duke marrë parasysh që këto emisione i shërbejnë gjithë komunitetit, janë shumë të nevojshme në televizion.”- u shpreh Shtino
