Hakerat të cilët sulmuan kibernetikisht sistemet digjitale të vendit tonë kanë arritur të hyjnë në e-mailin e ish-drejtorit të Policisë së Shtetit, Gledis Nano, dhe kanë publikuar të dhëna të rëndësishme.
Sipas Euronews Albania hakerat kanë publikuar dokumentin e Drejtorisë së Anti-terrorit të vitit 2017, në të cilin thuhej se pas disa hetimeve ishte arritur në përfundimin se ishte planifikuar një atentat ndaj Lulzim Bashës, i cili në atë periudhë ishte drejtuesi i Partisë Demokratike.
Në dokument, bëhet e ditur se tre janë personat e dyshuar të cilët do të kryenin atentatin ndaj Bashës.
Një ndër të dyshuarit, Afrim Morina nga Gostivari i Maqedonisë së Veriut, ishte i përfshirë në veprimtari antiligjore trafik droge dhe njihet si një person, i cili ishte i gatshëm të bënte gjithçka për para.
Arben Ymeri, nga Prishtina është praktikues radikal i fesë Islame, ish luftëtar xhihadist në Siri dhe lidhje me element radikal që kanë luftuar në Siri. Ai njihet si një person me rrezikshmëri të lartë dhe ishte është arrestuar në janar 2016, pasi është gjetur në rrugën e manastirit të Deçanit me uniformë dhe armë.
I dyshuari tjetër, Fatmir Gurgurovci, dyshohet se është përfshirë në atentatin e vitit 2010 ndaj Alfred Mustakës nga Durrësi, për shkak të konkurrencës lidhur me lojërat e fatit në Ferizaj, Kosovë.
Nga të dhënat e administruara nga policia gjyqësore, rezultoi se nga organet ligjzbatuese u siguruan informacione se 3 shtetasit, kanë dijeni apo lidhen me dyshime për planifikimin e një atentati ndaj Bashës, me qëllim destabilizimin e vendit.
