Presidenti amerikan, Donald Trump ka anuluar një vizitë shtetërore në Danimarkë, e planifikuar më 2 shtator, me ftesë të Mbretëreshës së këtij shteti, Margrethe II.
Duke njoftuar anulimin e vizitës, Trump ka thënë në një postim në rrjetin social, Twitter:
“Danimarka është vend shumë i veçantë me njerëz të jashtëzakonshëm, mirëpo bazuar në komentet e kryeminstres, Mette Frederiksen se ajo nuk ka interes për të diskutuar blerjen e Grenlandës, unë do të shtyj takimin tonë, të planifikuar brenda dy javëve, për një herë tjetër”.
Kujtojmë se javën e kaluar, presidenti i SHBA-së deklaroi se Shtetet e Bashkuara janë të interesuara që të blejnë Grenlandën, një territor autonom danez, por kryeministrja daneze, Frederiksen e ka pëshkruar këtë deklaratë si “absurde” dhe ka thënë se shpreson që Trump nuk ka qenë serioz në kërkesën e tij.
Ndërkaq autoritetet e Grenlandës kanë thënë se janë të hapur për tregti dhe bashkëpunim me SHBA-në, mirëpo “nuk janë në shitje”.
Grenlanda është duke fituar vëmendje nga fuqitë e mëdha globale, duke përfshirë Kinën, Rusinë dhe Shtetet e Bashkuara, për shkak të lokacionit strategjik dhe burimeve minerale./Opinion.al
