Këngëtarja e famshme me origjinë shqiptare, Eleni Foureira, mori një famë të madhe në të gjithë Evropën, pasi doli e dyta në festivalin e Eurovisionit me këngën e saj “Fuego”. Mirëpo, në atë kohë Eleni u kritikua si nga grekët dhe nga shqiptarët, që fshehu origjinën e saj dhe nuk fliste dot shqip.
Pas vizitës së saj në Tiranë, ku edhe performoi më 25 korrik në sheshin “Skënderbej”, këngëtarja ka dhënë një intervistë për Jonida Shehun, ku ka treguar arsyen se përse nuk fliste më shqip.
Sipas Elenit, ajo është larguar që në 97-ën nga Shqipëria dhe prindërit e saj u detyruan që në shtëpi të flitej vetëm greqisht, në mënyrë që fëmijët të perfeksionin gjuhën.
“Mami dhe babi vendosën të na flisnin në greqisht në shtëpi, që ne të mësonin gjuhën shpejt dhe të mos humbisnim shkollën, Ishte shumë e vështirë sepse nëna nuk donte që ne të humbisnim klasat dhe filluam të flisnim greqisht dhe kështu unë e humba shqipen megjithëse gjuha nuk harrohet kurrë. Unë e kuptoj por për të folur e kam të vështirë”, ka treguar Eleni. Ndër të tjera, këngëtarja e njohur është shprehur se ka punuar që 13 vjeçe, duke shpërndarë pamfleta në rrugë, që të ndihmonte familjen sepse ishin të varfër.
