Teksa na ndajnë rreth dy muaj nga zgjedhjet e 25 prillit, Monika Kryemadhi ka treguar se fokusi i LSI në zgjedhjet e 25 prillit janë socialistët e zhgënjyer nga Rilindja.
“LSI ka në fokusin e saj në këto zgjedhje socialistët e zhgënjyer të cilët në këto zgjedhje janë në një numër shumë të madh. Socialistët ndihen shumë komodë me Monika Kryemadhin, Luan Ramën dhe shumë të tjerë pjesë të LSI-së. Ka nevojë për përfaqësi. Në Tiranë kandidon Blerti Liçaj, i cili vjen nga PS, Etjon Joka që ka qenë kryetar i PS në njësinë 1 etj.”, tha Kryemadhi në një intervistë për A2.
Më tej, Kryemadhi tha se LSI nuk ka si qëllim të çojë PS-në për skrap por t’i rikthejë identitetin.
“Qëllimi ynë nuk është të çojmë PS-në për skrap, por t’i rikthejmë identitetin e tyre dhe të largojmë atë ndotje që ka bërë sekti i Rilindjes, vlerave të saj. Unë e kam nisur jetën që 16 vjeç në PS. Socialistët e kanë të lehtë për të lexuar për kë punon Rilindja. Kush socialist është në qeveri? Kush biznes socialist përfiton nga vendimet e Edi Ramës? Bizneset socialiste sot janë më të egrit kundër Edi Ramës. Ky është një moment për t’u bërë bashkë kundër një sekti kriminal që ka bllokuar ekonominë. Përfaqësuesi i PS-së në bashki akuzohet për lidhje me ‘Ndrangheta-n dhe pastrimin e parave të mafies”, përfundoi Kryemadhi./Opinion.al
